Uss è il rintg vegnì in zic pli gross ed er pli grev. Sch'ins crai als producents dal nov urdain, lura na survegnan ins cun far hula-hoop betg sulet ina pli fina taglia, mabain er ina pli ferma musculatura dal venter, dal dies, dal funs da la batschida, ed uschia vinavant. E tut quai possian ins far a chasa en stiva.
Il nov trend da rullar ils rintgs da hula-hoop enturn vita constatescha er la co-manadra da 80'20, ina fatschenta spezialisada sin trenaments, Ornella Poltera tar sia clientella. Part da lur purschida na fetschia il rintg da plastic però betg. Tuttina sustegna l'experta da sport da principi tals trends.
En sasez èsi vaira tuttina tge trend. L'impurtant è che la glieud sa mova ed ha plaschair.
En pli cusseglia ella da laschar la detta da pulvras e tablettas ch'empermettan da perder svelt intgins kilos. Tals trends na sustegnia ella insumma betg. Pli impurtant saja da midar il nutriment a lunga vista e da sa mover bler.
In pitschen center da fitness a chasa
Tar sia clientella constatescha la co-manadra da la fatschenta che porscha trenaments individuals in ulteriur trend. Sco Ornella Poltera declera, haja la glieud adina dapli urdains da sport en las atgnas quatter paraids, sco per exempel ina corda per siglir u paisas. Uschia vegnia la glieud adina pli independenta da centers da fitness. En quest reguard cusseglia ella a mintgina e mintgin d'emprender d'enconuscher bain ils urdains ch'ins haja a chasa, per lura er duvrar quels a moda correcta.
Ord l'archiv:
Per tgi che vul svegliar en il temp passà datti qua impressiuns ord l'archiv da RTR. L'entschatta dals onns 2000 ha RTR visità in curs da aquafitness sco er rapportà dal trend da nordic walking – il chaminar cun fists. Davart aerobic, il trend sportiv dals onns 1980 chattais Vus in video ord l'archiv da SRF. En pli cumplettescha ina satira davart aerobic che RTR ha realisà il 1983 la schelta ord l'archiv.
