Siglir tar il cuntegn

Header

cuntegn

Ulteriur Grischun Tscharner SA: Firmas fictivas?

En il register da commerzi chattan ins sut il num dal schef da l'interpresa da puntanadas Tscharner SA a Domat intginas societads cun responsabladad limitada pli pitschnas. Il sindicat Unia renfatscha che quellas sajan vegnidas messas en pe per engianar ils lavurers.

En il register da commerzi chattan ins sut il num dal schef da l'interpresa da puntanadas Tscharner SA a Domat intginas societads cun responsabladad limitada pli pitschnas. Il sindicat Unia renfatscha che quellas sajan vegnidas messas en pe per engianar ils lavurers.

L'interpresa da puntanadas è vegnida sut la marella publica perquai ch'ella na paja betg las sururas - da quai da duas sururas mintga di - a ses lavurers. Il sindicat Unia ha fatg ina denunzia penala en causa.

Advocat: «Naginas firmas fictivas»

Las societads cun responsabladad limitada pli pitschnas na sajan naginas firmas fictivas. Quai sincerescha l'advocat da l'interpresa Tscharner SA. I haja dà raschuns da taglia e da restructuraziun da fundar quellas. Cumpiglià en la restructuraziun saja ina midada da sistem. Tge midada da sistem n’ha l'advocat betg explitgà.

Quellas societads cun responsabladad limitada han mintgamai 3 manaders da fatschenta. In è adina la dunna dal schef da l'interpresa da puntanadas Tscharner SA. Ils auters 2 èn adina 2 lavurers da la Tscharner SA da derivanza macedona, bulgara, lituana u portugaisa. Cun quai che manaders da fatschenta èn exclus dal contract da lavur collectiv na stoppia il patrun betg pajar las sururas ad els. Ord quest motiv sajan quellas societads insumma vegnidas fundadas - uschia la renfatscha concreta dal sindicat Unia. Ils novs manaders da fatschenta n’hajan dentant - ord mancanza da chapir il linguatg tudestg dals novs contract - betg savì da quai.

I haja bain dà in pitschen augment da paja per els. Quel na cumpenseschia dentant betg las sururas betg pajadas, di l’Unia.

Nikola Georgiev, Marceon cun pass bulgar, in dals manader da fatschenta.
Legenda: Entamez: Nikola Georgiev, Marceon cun pass bulgar, in dals manader da fatschenta. RTR, M. Decurtins

Era manaders da fatschenta fictivs?

L'advocat da l’interpresa Tscharner ha dentant sincerà che mintga lavurer haja savì «100%» da quai ch'el saja uss manader da fatschenta. Ins haja fatg els tar manaders da fatschenta per dar ad els dapli responsabladad en l'interpresa. La interpresa da puntanadas ha tenor pagina d'internet tranter 20 fin 30 lavurers. Da quels èn 8, pia var in terz, manaders da fatschenta da societads pitschnas.

Sche las indicaziuns ch'ils lavurers han fatg envers il sindicat Unia, u sche las explicaziuns da l'advocat da l'interpresa Tscharner SA correspundan a la realitad, quai vegn da preschent sclerì da la procura publica. Il cas è pendent.

Artitgels legids il pli savens