Siglir tar il cuntegn
Inhalt

Ulteriur Grischun Tscharner SA sin glista naira dal chantun

Malgrà che la cumissiun paritetica è sa cunvegnida cun la Tscharner è vul reabilitar ella, ha la regenza mess la firma da Domat sin la glista naira dal chantun. Quai munta ch’il maun public na dastga puspè betg surdar lavurs a la Tscharner.

La firma da Domat è sin la glista naira dal chantun.
Legenda: Tscharner SA La firma da Domat è sin la glista naira dal chantun. RTR

Dapi ils 9 da matg è la firma da palancaus Tscharner SA da Domat sin la glista naira dal chantun. Quai munta ch’il maun public na dastga betg surdar lavurs ad ella. Quai perquai che la Tscharner ha violà il contract da lavur collectiv.

Per la cummissiun paritetica è il cas serrà. Per il chantun e la procura publica cuntinuescha il cas Tscharner dentant.
Legenda: Infografica davart il cas Tscharner Per la cummissiun paritetica è il cas terminà. Per il chantun e la procura publica cuntinuescha il cas Tscharner dentant. RTR

Il chantun ha dentant pir decis passa in onn suenter che las cugliunarias da la Tscharner èn vegnidas publicas. La raschun per quai è ch’il chantun haja stuì spetgar giu la decisiun da la cumissiun paritetica ed er la decisiun definitiva da la procura publica, uschia Mario Cavigelli, il cusseglier guvernativ responsabel.

Confusiuns en il fratemp

Quai fatg ha dentant chaschunà confusiuns. La cumissiun paritetica, ch’è responsabla persuenter ch’il contract da lavur collectiv da la branscha da palancaus, ha numnadamain puspè dà enavos la confurmitad dal contract da lavur collectiv l’entschatta da l’onn – ed uschia ha er il maun public durant tschintg mais puspè pudì surdar lavurs.

Cuira ha surdà lavur

En quest fratemp – cura che la Tscharner era libra er per il maun public – ha la citad da Cuira numnadamain surdà ina lavur. Quai conferma Tom Leibundgut, il manader dal departament da bajegiar da Cuira. Ins saja dentant vegnì da bloccar l’incumbensa avant che las lavurs han cumenzà. Il problem saja stà che Cuira gnanc saveva ch’i dat ina tala glista naira.

Naginas consequenzas

Il chantun ha dentant infurmà la citad avant che las lavurs han cumenzà uschia ch’i na dat naginas consequenzas per la citad da Cuira. Er per la Tscharner na dettia quai naginas consequenzas, uschia Mario Cavigelli. La Tscharner fiss dentant tenor lescha da submissiun obligada dad infurmar il maun public davart il fatg ch’ella na dastga betg prender encunter incumbensas. Rico Tscharner, il maina gestiun da la Tscharner SA, na vuleva betg prender posiziun envers RTR.

RR actualitad 12:00