Organisar nozzas è ina lavurada, perquai sa decidan pli e pli blers d’engaschar agid professiunal en furma da planisadras da nozzas.
Savens lavuran omadus tschient pertschient e n'han naginas resursas per organisar la festa. Els vulan dentant tuttina in di ch'els n'emblidan mai pli.
Grondas discussiun tar la planisaziun da nozzas dat la decoraziun. Dunnas vulan ina bella decoraziun e flurs, umens pudessan savens desister da quai. Perquai èsi da tschertgar cumpromiss.
Maridar pli tard
Spus e spusa èn ozendi pli vegls cura ch’els maridan. Uschia è il preventiv era pli grond e la planisaziun po daventar pli cumplitgada. Impurtant saja da salvar la survista da l’entir di, uschia ch’i dettia naginas collisiuns da program, di Olivia Derungs, planisadra da nozzas. Sin giavisch dals spus surpiglia ella era la coordinaziun il di da nozzas, per distgargiar maiors da maisa, perditgas, spus e spusa.
Il trend da nozzas sa numna vintage
Vintage è ina cumbinaziun da materials vegls e novs, lain rustical cun vels delicats, in stil romantic. Las rassas vintage èn plitost cun in tagl grad, massa taila da pizs, umens pon per exempel purtar givlars ed ina tschitta.
Ceremonia gea, ma betg exnum en baselgia
Pli e pli paucs festiveschan nozzas en baselgia, malgrà ch’il dumber da nozzas civils resta stabil, 40’000 nozzas datti ad onn en Svizra, radund 1’000 en il Grischun. Tar blers haja la religiun pers la muntada en il mintgadi, concluda l’institut pastoral-sociologic svizzer.
Las variaziuns da ceremonias libras èn infinitas
Christian Ruch è dapi 11 onns creader da rituals. Ina construcziun che disturbi bunamain tut ses clients saja «enfin che la mort sparta vus». Ina ceremonia libra possian ins festivar dapertut, en quella furma ch’il pèr giavischia.
La chemia sto constar. Sche jau hai il sentiment che insatge na constat betg en la relaziun dal pèr, u sch’il pèr n’è betg simpatic, lura na fatsch jau betg la ceremonia cun els, lura vegniss la nozza betg bella.
Ceremonias libras èn pli individualas e persunalas che nozzas en baselgia. Quai plascha al pèr ch’engascha Christian Ruch, parents pli religius che n’èn betg usitads cun ina tala furma da maridar pon esser sceptics. Sco en il cas d’in pèr che leva maridar en il chastè da Sargans. Il plevon na leva betg far là la ceremonia. Uschia ha la spusa telefonà quatter emnas avant las nozzas a Ruch per surdar ad el la batgetta. Cura ch’el saja entrà en baselgia, haja el sentì in mir da refusaziun. Ma immediat cura ch’el haja fatg la sontga crusch, saja la tensiun svanida. Religiun ha numnadamain plaz en ina ceremonia libra, sch’il pèr giavischa quai.
Musica evochescha regurdientschas
Chanzuns adina puspè dumandadas da nozzas èn tranter auter «Perfect» dad Ed Sheeran e «You Raise Me Up» da Josh Groban, di Wolfgang Frank, musicist, chantautur e ghitarrist. L’Austriac da 48 onns suna savens per nozzas.
La schelta da musica è savens in cumbat. In vuless pli gugent musica da rock, l'auter pli gugent in toc romantic. Jau gid da far in cumpromiss, e lura èn tuts ventiraivels.
Chanzuns ch’ins na po betg sunar durant las nozzas na datti betg. Frank ha schizunt ina giada sunà «Highway To Hell» dad AC/DC, en baselgia. El sez sa regorda vi da sias nozzas, sch’el auda la chanzun «Angels» da Robbie Williams. Quella haja el sez sunà e chantà da sia ceremonia.
La moda da nozzas vegn pli lucca
Las pli novas rassas da nozzas n’èn betg pli resch alvas u ivur, ellas èn ivur cun ina rassa rosa suten. Quai saja bun per il teint da la spusa, di Anette Crameri, possessura da la fatschenta da resti da nozzas Dolce Vita a Cuira. Il stil preferì è vintage, las rassas han in simpel tagl grad e massa taila da pizs. La spusa po era cumbinar ina giacca da jeans cun la rassa. Il spus po purtar givlas, tschitta e schizunt tschappas alvas.
Maridar daventa pli luc, ins ha en quai ch’ins sa senta bain, spus e spusa na sa travestgeschan betg pli.
Sch’i na dat nagina ceremonia, lura sa decidan las spusas savens per in vestgì da cocktail, ina rassa pli simpla. Là domineschan las colurs rosa, tuns da pel e tuns da fim.
