La mesemna suentermezdi a la scol'auta spezialisada dal Grischun FHGR tutga als uffants. Tar il lavuratori «Tge fa in inventader?» han ils uffants pudì dar in cuc en il mund dals inventaders. La collavuratura scientifica Jeanine Bretti-Rainalter ha accumpagnà ils 13 uffants. La finamira èra da promover la creativitad e d’avair in suentermezdi legraivel cun differentas challenges.
Nicola Tesla, Albert Einstein, Marie Curie...
En ina part teoretica han ils uffants emprendì tge ch’i munta dad esser in inventader. Da l’autra vart ha la mussadra preschentà inventaders renumads e declerà co lur grondas invenziuns hajan midà il mund. Menziunà è vegnì Albert Einstein cun sia teoria da relativitad, Marie Curie sco emprima chemicra ni Nicola Tesla, ch’ha inventà il current alternant. Curt suenter eran ils uffants tschiffads da l’idea da daventar sez inventader e quai han els lura era pudì mussar tar differents exercizis.
Betg pensar, simplamain empruvar
Cumplettamain fascinà da las invenziuns èn ils uffants stads fitg motivads dad prender a maun in project ed uschia ha la mussadra lura preschentà la challenge: Cun spaghettis, fil, bindel da tatgar e marshmallows hajan ils uffants da bajegiar ina tur e la gruppa cun la pli gronda tur gudogna. Cun grond gust han ils uffants lura fatg las turs.
Il bel è ch’uffants emprovan simplamain senza grondas planisaziuns. Quai dat en general ils megliers resultats.
Tranteren è ina u l’autra tur crudada. Nagin ha en quest mument pers la fidanza, mabain ha cun in'ulteriura emprova emprendì dals sbagls. La pli auta tur cun 65 centimeters ha lura gudagnà la concurrenza.
RTR actualitad 11:15