Siglir tar il cuntegn

Header

cuntegn

Ulteriur Grischun Uss tuttina – Russia al proxim WEF

Moskau aveva smanatschà da betg prender part al Forum mundial d'economia a Tavau. Quai saja uss sa midà, citescha l'agentura da novitads SDA las gasettas «NZZ am Sonntag» e «Financial Times».

Basa per la smanatscha da Moskau da boicottar il WEF 2019 era in scumond dals organisaturs dal WEF: Cun quai ch'ils Staids Unids avevan decretà sancziuns cunter trais oligarchs russ, aveva il WEF scumandà a quels da vegnir a Tavau. Sinaquai aveva il primminister Dmitri Medwedew smanatschà il november che la Russia boicotteschia l'occurrenza.

Uss haja il WEF abolì las sancziuns ed il directur dal WEF, Alois Zwinggi, sa legria che la Russia tramettia ina delegaziun da la regenza a Tavau. Quai rapporta la SDA tenor las gasettas «NZZ am Sonntag» e «Financial Times» che sa basan sezzas sin l'agentura da novitads statala russa.

Ils trais oligarchs amez la discussiun èn Viktor Vekselberg (Renova), Oleg Deripaska (EN+ Group), ed Andrej Kostin (VTB Bank). Vekselberg è acziunari grond tar pliras interpresas svizras.

RR novitads 06:00

Artitgels legids il pli savens