Siglir tar il cuntegn

Header

cuntegn

Ulteriur Grischun Va la citad veglia da Cuira a la malura?

Sch’ins va tras la citad veglia da Cuira ves’ins inqual vitrina vida. E magari hai era pauc glieud. Sentan las pitschnas fatschentas la concurrenza dal center da cumpra City West? U è la plazza da la staziun ussa uschè attractiva ch’ils passants na van betg pli en la citad veglia?

La glieud manca en la citad veglia da Cuira. Intgins possessurs da fatschentas u cafés n’èn betg cuntents cun la situaziun. Gronds centers da cumpra fetschian concurrenza, la citad sa fatschentia mo cun la via da la staziun.

audio
CUIRA 1
ord Actualitad dals 11.07.2016.
laschar ir. Durada: 2 minutas 52 Secundas.

Intginas ideas

Linus Caduff dal café Arcas e Zschalèr manegia ch’i fiss bun da far in’entrada pli attractiva datiers dal Lindenquai. Ils molocs na sajan nagut bel.

Regula Carigiet che posseda ina bischutaria giavischass dapli bancs e flurs. E Rita Albin dal Globus d’umens accentuescha che la citad e las uniuns na duajan betg centralisar las festas mo sin la via da la staziun. Tut las vias a Cuira sajan impurtantas.

Per la citad da Cuira n'è la situaziun betg in problem

Urs Marti, president da la citad da Cuira è da l’avis ch’i haja avunda glieud. La populaziun indigena ed ils turists stimian la citad veglia e las fatschentas pitschnas.

Plans per decorar la citad veglia

Tom Leibundgut accentuescha che la citad veglia è vegnida renovada sco emprima, cun la sulada sin il palantschieu. Ussa saja la via da la staziun stada emprima prioritad. I dettia dentant plans da dar dapli colur a la citad da Cuira, cun bancs e fluras.

Betg mo chaussa da la citad

Ils consuments duajan puspè cumprar dapli en la citad, sch’els veglian ina citad veglia viva, di Urs Marti.

audio
Cuira: La citad veglia vegn tralaschada
ord Actualitad dals 11.07.2016.
laschar ir. Durada: 2 minutas 43 Secundas.

In dals gronds problems saja la concurrenza da l’internet. E mintga possessur stoppia dar bregia cun esser amicabels, innovativs, far reclama e forsa mirar che tut las fatschentas avessan avert il medem mument.

Sa spezialisar per attrair la glieud

Coiffeurs, restaurants e bars datti sco sablun sper la mar. Dentant èsi las fatschentas pitschnas che porschan insatge spezial che carmalan la glieud.

Cupcakes, sneakers ed ieli d'argan

La pastiziera da cupcakes è fitg cuntenta cun la vendida. Ses cupcakes na fetschian betg gross, mabain ventiraivel. Era il possessur da la fatschenta da sneakers manegia, ch’ins stoppia porscher insatge ch’i na dettia uschiglio betg en la citad da Cuira. Lura vegnian ils clients.

audio
Cuira: La citad veglia porscha enqual spezialitad
ord Actualitad dals 11.07.2016.
laschar ir. Durada: 2 minutas 26 Secundas.

Memia paucas fatschentas spezialas

El na sappia betg sa lamentar da memia pauc glieud, di il possessur da la fatschenta che venda ieli d’argan. Deplorablamain na dettia quai betg bleras fatschentas uschè spezialas en la citad veglia da Cuira.

La citad veglia saja fitg bella, dentant na vegnian ils clients betg qua per laschar tagliar ils chavels u per cumprar resti; i duvrass dapli spezialitads.

RR actualitad 06:00

Artitgels legids il pli savens