Siglir tar il cuntegn

Ulteriur Grischun Vaguns da vitgira èn sviads en la staziun da Landquart

Tar in accident da manevrar en la staziun da Landquart èn mardi saira dus vaguns da vitgira sviads. I n'ha dà nagins blessads. Cunquai ch'i ha dà curt suenter in defect vi d'ina lingia electrica è il traffic da viafier tranter Cuira e Landquart stà bloccà dal tut.

Staziun da Landquart
Legenda: Suenter l'accident cun ils dus chars da vitgira è il traffic da viafier tranter Cuira e Landquart stà bloccà dal tut. Keystone

Il mardi saira curt avant las 09:00 sajan ils dus vaguns sviads cun manevrar. Ils motivs sajan anc betg enconuschents, ha in pledader da la SBB detg envers l'agentura da novitads SDA. Latiers sajan ils dus vaguns cupitgads ed hajan donnegià ina pitga da lingias da contact.

Vers las 23:00 è lura ina lingia electrica vegnida donnegiada ed il traffic da viafier tranter Cuira e Landquart è stà interruts per radund trais uras. Ils passagiers èn vegnids transportads cun bus. Sch'i dat in connex tranter il sviar dals dus vaguns e la lingia electrica defecta, n'ha il pledader da l'SBB betg pudì dir.

RR novitads 06:00