Ch’il Signuradi è ina pitschna regiun cun gronds vins è enconuschent en Svizra gia dapi decennis. Dapli 2 onns ha Robert Parker, il guid da vin il pli renumnà dal mund, cumenzà a punctar vins en Svizra, e quels dal Signuradi persvadan ils experts. Gist trais dals megliers 5 vins publitgads quest onn derivan da la pitschna regiun tranter Fläsch e Malans.
Internaziunal ina pitschna schanza da survegnir in bun vin Grischun
Gastronoms ed amaturs da vin internaziunals han grev da survegnir in bun vin dal Signuradi. Cun mo 420 hectaras è il territori en congual cun autras regiuns enconuschentas (Burgogna ca. 30’000 ha) fitg pitschen.
Ils buns vins dals radund 70 viticulturs da la regiun èn vendids ora en paucas uras. Blers viticulturs han era la filosofia da servir sco emprim la clientella stabla indigena cun lur products. Quai è en tut la Svizra il cas. Ed uschia vegn exportà en media pli pauc che 1,5% da la producziun annuala.
Il Signuradi sco nova Burgogna?
In ch'è responsabel per ina gronda part dal success dals vins dal Signuradi è il viticultur Thomas Donatsch. Avant 40 onns ha el visità producents da vin en la Burgogna, ha emprais sco ch’els produceschan lur buns vins ed ha manà il know how ed ils emprims butschins da barrique enavos en il Signuradi.
Da quai ch'ils ins han l'emprim surris, han silsuenter tuts surprendì. Thomas Donatsch ha quasi manà la Burgogna en il Signuradi ed ils vins han midà dapi lura. Els èn vegnids pli nobels, pli elegants, pli burgognais.
Per quella lavur da pionier ha GaultMillau prendì si el quest onn en il stretg circul da las iconas dal vin svizzer.
Viticulturs na vulan betg esser vanaglorius
Da la qualitad èn ils megliers vins dal Signuradi ozendi sin il medem stgalim sco ils Grand Crus da la Burgogna. Tar il pretsch è la differenza però fitg gronda. Tranter 40 e 70 francs custa en il Signuradi ina buttiglia d’in «top» vin. Tar quels da la Burgogna discurr'ins schont da plirs 100 francs.
En sasez pudessan ils viticulturs che possedan vins premiads auzar lur pretschs massiv, senza avair problems da vender lur vins. Per entant n’è quai però betg in tema. Per ils viticulturs dal Signuradi èsi pli impurtant da pudair vender ils products a la gastronomia da la regiun ed a lur clients stabels, che da far profit en l’exteriur.
TR Telesguard 17:40