La vischnanca da Malans ha approvà la revisiun totala da la constituziun communala. Tranter auter ha quai midà che la constituziun prevesia uss er votaziuns ed elecziuns a l'urna. Sut la resalva da l'approvaziun da la regenza va la nova constituziun il 1. da zercladur 2021 en vigur.
Quint annual positiv
Ultra da quai ha la radunanza communala er approvà il quint annual che serra cun in plus dad 1,7 milliuns francs. Il quint serra meglier che budgetà. Ins haja er pudì realisar in cashflow da var 1.91 milliuns francs. Las investiziuns nettas sa movan il 2020 tar 1,09 milliuns francs e han pudì vegnir finanziadas cumplettamain or dals cashflow.
Stgaudament
Era approvà ha il suveran da Malans in credit da 710'000 francs en connex cun la renovaziun dal sistem da stgaudament en l'edifizi da la vischnanca amez il vitg. Igl è vegnì decidì d'installar in stgaudament da pellet.
