Anna Pitschen ha 61 onns e stat en in'abitaziun da trais auzadas amez la citad da Cuira. Cunquai ch’ella ha sclerosa multipla abita ella en il plaunterren perquai ch’autras auzadas fissan memia stentusas e stanclentusas per ella.
Ina malsogna cronica è en perpeten
La sclerosa multipla ha bleras fatschas e sa mussa tar mintgin differentamain. La malsogna sa mussa tras in disturbi da la gnerva tranter tscharvè e dies. Quai fa ch’ils malsauns dovran blera energia e che gia moviments pitschens san esser stanclentus. Tenor Anita Pitschen sa mussa la sclerosa multipla sch’ella stat memia ditg sin pes. Lura dettia muments nua che las chommas na san betg pli tegnair la paisa e lura croda ella savens. Cunquai ch’igl è ina malsogna cronica sto ella emprender da viver cun quella.
Ina lunga intschertezza
Tenor Anita Pitschen haja ella gia baud en l’uffanza gì difficultads cun la gnerva. Ils medis èn ditg stads da l'opiniun ch’i sa tractia d’epilepsia. Pir bler pli tard saja la sclerosa multipla vegnida diagnostitgada. La malsogna ha er engrevgià da lavurar e bainbaud è Anita Pitschen vegnida relaschada. En il 2008 eri lura uschè avanzà ch’ella ha cumenzà a retrair la renta d’invaliditad. Malgrà tut haja ella mai pers la speranza. Sia tenuta positiva e l’acceptanza d’avair la malsogna haja adina gidà fitg. Perquai sa fatschenta la dunna da Cuira er savens cun ses hobis – cuser e zambregiar. Vinavant giaja ella gugent cun il tren per la Svizra enturn, dentant dovra ella per gliez sia sutga da rodas electrica.
RR actualitad 07:00