Siglir tar il cuntegn

Header

Ueli Thöny.
Legenda: Il president communal Ueli Thöny manegia ch'il project è vegnì refusà tranter auter pervia da la crisa da corona. RTR, Claudia Cadruvi.
cuntegn

Votaziuns communalas a Schiers Ils votants vulan segirtad avant ch'i vegn bajegià

Ils da Schiers han ditg la dumengia Na ad in credit en favur dal turissem ed era Na al parc da mastergn planisà. Il president communal Ueli Thöny manegia d'enconuscher las raschuns.

Las trais dumondas en connex cun il parc da mastergn «Ausser dem Sagensteg», ha il suveran da Schiers refusà cun mintgamai radund 300 cunter 200 vuschs.

L’idea oriunda è stada da metter il fundament per in parc da mastergn per impressaris – be interessents concrets han fin a la votaziun mancà. Tenor Ueli Thöny hajan ins sco emprim vulì crear l’infrastructura. Il resultat mussa dentant: Per ils votants saja la ristga d'approvar in credit da 2,1 milliuns francs senza savair sch’i dettia insumma ina dumonda stada memia gronda. Uschia che quel è vegnì refusà.

La crisa da corona ha impedì la votaziun

Plinavant manegia il president communal Ueli Thöny che la crisa da corona haja anc laschà crescher las retegnientschas. Cun l’economia franada durant la crisa saja la glieud sa dumandada sch’i dovra anc questa purschida. La vischnanca n’haja era betg savì prender la tema dals votants cunquai che la radunanza communala ordavant na sa betg stada pussaivla.

Returnar cun dapli segirtad

Il project na duaja ussa dentant betg vegnir sutterrà, mabain surlavurà. La vischnanca vul sco proxim pass far dapli reclama per il spazi e gudagnar interessents concrets. Sche tut va tenor plan duaja il project entaifer ils proxims 2 onns vegnir purtà a l’urna

RTR novitads 12:00

Artitgels legids il pli savens

Scrollar a sanestra Scrollar a dretga