Il fundatur dal WEF, Klaus Schwab, vuless in Forum mundial d'economia pli pitschen. En ina brev da lectur en la «Davoser Zeitung» scriva Schwab, ch'els vegnian a reducir il dumber da participants. Vitiers giavischa el che las stizuns per lung la promenada na vegnian betg pli dadas a fit durant il WEF e ch'i na dettia nagins pretschs exagerads pli. Cun redimensiunar l'occurrenza pudess ins er reducir il traffic, uschia Schwab.
Per l'onn 2021 saja previs in WEF pli pitschen ed er pli curt. Perquai n'hajan els er betg tschernì Tavau per realisar l'occurrenza. Ins na veglia betg ch'ils participants e las participantas hajan las medemas spetgas sco ils auters onns, mabain ch'els vesian pertge ch'i dovria in auter lieu per far cler ils privels da la pandemia da corona – sch'i saja lura il 2021 insumma pussaivel da far in WEF, tut tenor svilup da la pandemia.
Suenter ch'il WEF 2021 n'ha betg lieu a Tavau, sa legria el sin in Forum mundial d'economia il schaner 2022 a Tavau, ha Klaus Schwab scrit.
