Sin la plazza da parcar han radund 150 lavurants construì l'uschenumnà «Pavillon». El guarda ora sco ina chasa moderna cun grondas fanestras.
Quai è il punct central durant il WEF.
Durant l'emna dal WEF è quai l'unica entrada. La polizia e l'armada vegnan di e notg a controllar la glieud che vul entrar en l'hotel. Vinavant sa chattan en il bajetg dus studios da televisiun, divers locals da conferenza sco era plirs biros.
Ina stanza, in biro
Enturn 100 presidents, ministers u CEO's dorman durant il WEF en il Steigenberger. Quals giasts na dastgan els betg tradir. Cun quai che l'hotel è be paucs pass davent dal center da conferenzas saja el fitg dumandà. Or da radund 70 stanzas d'hotel fan els biros, uschè Tina Heide. Ella ha perfin stuì rumir ses agen appartament.
Radund 300 occurenzas han lieu en las differentas stanzas da l'hotel. Perquai han els fabritgà enturn diversas salas en locals da conferenza. Durant il WEF è il Steigenberger in hotel da business. Giasts «normals» n'han nagina plazza pli.
Trais giadas dapli collavuraturs
Per il bainesser dals giasts miran bunamain 300 collavuraturs. 200 vegnan extra per il WEF a Tavau. Ils cuschiniers, camariers e camarieras sco era il persunal per nettegiar vegnan u d'auters hotels da la lingia Steigenberger, u ch'els s'annunzian tar l'hotel. «Nus vain ina entira glista da spetga per il persunal. Blers vulan far quella experientscha», uschè Tina Heide.
RR actualitad 07:00