WEF - Las mobilias da Casty fan plazza a la Credit Suisse

1 / 6

Legenda: La halla al plaunterren è gia rumida dal tut e pinada per la novas mobiglias da la Credit Suisse. RTR, Pietro Jacomet

2 / 6

Legenda: Gian-Claudio Casty, il manader da fatschenta da la firma da mobiglias «Casty Wohnen». RTR, Pietro Jacomet

3 / 6

Legenda: Ina da las ultimas mobilas ch'il manader da fatschenta sto rumir ord la gronda halla al plaunterren. RTR, Pietro Jacomet

4 / 6

Legenda: Era il logo da «Casty Wohnen», che è mumentan anc grond vid la chasa, vegn a svanì durant il temps dal WEF. RTR, Pietro Jacomet

5 / 6

Legenda: Ina mobiglia sin tschella – tut sto en il magasin. RTR, Pietro Jacomet

6 / 6

Legenda: Qua vegn extra bajegià par il WEF tualettas – ed en la stanza speras ina cuschina temporara. RTR, Pietro Jacomet

Durant il WEF pon ins a Tavau vesair politichers, acturs ed en general la prominenza da l'entir mund. Quai è era ina schanza per las grondas firmas, da sa preschentar a la societad auta. Interpresas indigenas mettan pervi da quai a disposiziun lur filialas ed affittan las localitads a grondas fatschentas. Uschia pon ins durant il WEF per exempel chattar la banca gronda Credit Suisse en las localitads da la firma da mobiglias «Casty Wohnen», directamain tar la Promenada a Tavau.

audio

Mezdi: WEF 2019: Rumir la butia è in affar lucrativ

03:37 min, ord Actualitad dals 16.01.2019.

laschar ir. Durada: 3 minutas 37 Secundas.

Tut(s) sto(n) ora

Il manader da fatschenta Gian Claudio Casty affitta ses local gia dapi passa 10 onns. Per duas emnas ston tuttas mobiglias en la halla al plaunterren svanir. Medemamain vegnan tut ils biros rumids en il magasin. La Credit Suisse bajegia si tut nov en las stanzas: En la halla dal plaunterren ina zona da scuntrada cun bar ed en ils biros en la secunda auzada datti stanzas da sesida. Medemamain vegn in entir nov sistem d'internet e telefon mess en funcziun ed ina cuschina temporara vegn installada en las localitads.

Er ils abitants da las duas abitaziuns ed il studio sisum la chasa van per quellas duas emnas davent. Uschia possian ils collavuraturs da la Credit Suisse gist durmir en chasa. Las mobiglias restian dentant en las abitaziuns.

Jau na crai betg ch'ils participants dal WEF vegnian a Tavau per cumprar canapés.

Cunvegna lucrativa per la fatschenta da mobiglias

Per dar a fit las localitads a la Credit Suisse dettia ina bella summa, numnadamain passa 100'000 francs. Quels daners na vesia dentant betg directamain la fatschenta, sco Gian-Claudio Casty ha ditg, mabain ils locaturs da la chasa. Dentant survegnan tut ils 10 lavurers da la firma «Casty Wohnen» durant quellas duas emnas vacanzas pajadas e vegnan indemnisads per il rumir e bajegiar si tut danovamain.

Plinavant datti er anc auters motivs per la fatschenta da dar a fit la fatschenta: Durant il WEF na pon ins betg charrar cun auto tras Tavau. Uschia gnanc fissi pussaivel dad ir a montar tschertas mobiglias. Plinavant è la sessiun auta enturn Nadal cun blers turists sin pista, loipa u a la Cuppa Spengler.

RR actualitad 12:00