Siglir tar il cuntegn

Header

audio
Viadis extrems cun Gian Marchet Schicktanz
Or da Actualitad dals 05.08.2022.
laschar ir. Durada: 4 minutas 8 Secundas.
cuntegn

Ultra Trail Running «Sch'ins cumenza ina giada a trenar, èsi grev da chalar»

Currer in «ultra trail» munta da currer enormas distanzas sin terren natiral. L'Engiadinais Gian Marchet Schicktanz è in tal «ultra trail runner». El raquinta da sia passiun, sias proximas finamiras e dat in tip impurtant per entscheviders ed entschevidras.

Ina distanza d'almain 80 kilometers respectivamain ch'ins curra pli ditg che tschintg uras – uschia descriva Gian Marchet Schicktanz in «ultra trail». Cumenzà ha sia passiun cun ina tura tras la Svizra: l'Engiadinais è currì da Samnaun a Genevra. Sinaquai ha el entschavì a trenar ed a sa participar a cursas. Ad il giuven Engiadinais plaschi meglier da currer en la natira che sin asfalt. «Ultra trails» porschian dapli variaziun. Currer sin asfalt fetschia el plitost per congualar ses temps.

I ma fascinescha da vesair tge ch'il uman è abel da far. Avant mia emprima cursa da 100 kilometers n'avess jau betg pensà che quai saja pussaivel. Uss sai jau ch'ins po schizunt anc dumagnar dapli.
Autur: Gian Marchet Schicktanz Currider dad «Ultra Trails»
In um che curra d'in culm si.
Legenda: Gian Marchet Schicktanz en acziun. Gian Marchet Schicktanz

Finamiras e feridas

Ses pli grond success fin uss ha il currider cuntanschì quest onn al «Lavaredo Ultra Trail». Quai era sia emprima cursa internaziunala ed el ha cuntanschì il segund plaz. Durant quella cursa s'ha el però era ferì. I sa tracta d'in'uschenumnada «overuse injury», ch'il corp è pia surstrapatschà. Atgnamain prendess l'Engiadinais gugent part ad ina da las otg cursas dal «Ultra Trail du Mont Blanc» che han lieu la fin d'avust, pervia da la ferida n'è el dentant anc betg segir sche quai è pussaivel.

Ultra Trail du Mont Blanc

Avrir la box Serrar la box

L'«Ultra Trail du Mont Blanc» ha lieu dals 21 fin ils 28 d'avust. I sa tracta d'otg differentas cursas enturn il culm. La cursa pli dira da 170 kilometers maina da Chamonix a Chamonix. Gian Marchet Schicktanz sa participass gugent al CCC – ina tura da 100 kilometers da Courmayeur a Chamonix.

Sentiments e patratgs durant cursas

Avant ina cursa saja el savens gnervus, cunzunt avant cursas internaziunalas, nua che glieud cun blera experientscha prenda part, conceda Gian Marchet Schicktanz. Cura che la cursa cumenza cun il signal da partenza, quintia mo pli quai. Alura curria el senza pausa, era tras ils posts che porschan da baiver.

Durant ina cursa sa chattan ins en in sort tunnel. L'adrenalin gida d'ignorar il mal ch'ins ha durant ils davos kilometers.
Autur: Gian Marchet Schicktanz Currider dad «Ultra Trails»

Sch'igl è pussaivel da finir la cursa cun in bun resultad, saja quai in sentiment grondius. L'Engiadinais manegia ch'el possia strusch descriver il sentiment.

Trenament

Gian Marchet Schicktanz pensa ch'in «ultra trail» saja pli pauc privlus ch'in maraton. El cusseglia però ad entschaviders ed entschavidras da cumenzar plaun, da p.ex. mo ir a chaminar pliras uras durant ils emprims trenaments. Ins duessi tadlar sin l'agen corp.


El persunalmain va il pli gugent a trenar sin il Mittenberg ed il Montalin en la regiun da Cuira. Là è el savens d'inscuntrar – e speranza era en trais emnas al Ultra Trail du Mont Blanc.

RTR actualitad 07:00

Artitgels legids il pli savens

Scrollar a sanestra Scrollar a dretga