Siglir tar il cuntegn

Header

cuntegn

Undas da chalira Las citads suan – er Cuira

Il clima sa mida. I dat adina dapli undas da chalira. Cunzunt las citads cumbattan cun las temperaturas autas. Perquai che las surfatschas asfaltadas e betunadas as stgaudan fitg ed accumuleschan la chalira. I dess dentant mesiras per meglierar il clima en las citads.

Gia en 30 onns pudessan las undas da chalira che nus avain actualmain mintga 10 onns vegnir avant mintg'onn. Quai demussan quints da model da Meteo Svizra. I valess ussa da prender mesiras per pudair meglierar il clima en las citads, di Sandra Bühler, docenta per architectura e planisaziun urbana da la Scola auta spezialisada dal Grischun.

La situaziun a Cuira

Tenor la statistica da las citads svizras èn 7% da la surfatscha publica da la citad da Curia zonas verdas. Cun quai è Cuira sin plaz 30 da 40. Quai as stoppia dentant relativar, di Sandra Bühler. Per l'ina dettia a Cuira bleras zonas verdas sin territori privat so per exempel il quartier «Stampagarten» e per l'autra saja Cuira situà en ina cuntrada verda. Davent da Cuira èn ins en paucas minutas cun il velo en il verd. Quel avantatg n'han autras citads betg. Era da la topografia e la posiziun alpina è Cuira situà bain.

audio
Co è la situaziun a Cuira?
ord Actualitad dals 16.08.2022.
laschar ir. Durada: 2 minutas 40 Secundas.

Mesiras encunter chaliras

Da principi datti trais pussaivladads per sfradentar ina citad: vent, aua e sumbriva. Sco citad alpina ha Cuira in avantatg. Il favugn ed il vent che vegn la saira dal Scanvetg e dals guauds damanaivels procuran per ina ventilaziun dal territori da la citad. Sper il vent dattan auas e surfatschas bletschas giu umiditad al conturn, e quai gida da sfradentar. Ed era sumbriva gida tar chaliras. Plantas dettian sumbriva, ed han anc auters effects positivs.

audio
Sandra Bühler: Co pon ins sfradantar ina citad?
ord Actualitad dals 16.08.2022.
laschar ir. Durada: 2 minutas 59 Secundas.

Tge fa Cuira?

La citad prendia gia uss mesiras, di la suprastanta e manadra dal departament da construcziun, planisaziun ed ambient da Cuira, Sandra Maissen. Tar lavurs vid vias vegnia per exempel tenor pussaivladad mess plantas a l'ur. Tar projects novs sco la staziun da Cuira Vest vegnia resguardà ils facturs en favur dal clima da la citad. Uschia vegn per exempel gist testà in asfalt alv. Era mirs da sustegn verdinads èn planisads.

I sa chapescha da sez ch'ins s'occupa cun la tematica dal clima en la citad.
Autur: Sandra Maissen departement construcziun planisaziun ed ambient

Era da la populaziun datti squitsch: Actualmain vegn rimnà suttascripziuns per «l'iniziativa per il clima da la citad». Sandra Maissen quinta, che quella vegnia anc inoltrada quest onn. L'iniziativa pretenda che 1% da la surfatscha da la Citad da Cuira vegnia mintg'onn transfurmada en zonas verdas, per peduns u velocipedists.

audio
Sandra Maissen: Tge fa la citad da Cuira?
ord Actualitad dals 16.08.2022.
laschar ir. Durada: 3 minutas 12 Secundas.

Tar la citad da Cuira è in «masterplan per energia e clima» en elavuraziun. Quel s'occuppa da la protecziun dal clima ed era cun las mesiras en favur dal clima en la citad. La finamira saja, da pudair preschentar quel la fin da l'onn, ha ditg la suprastanza communala da la citad da Cuira.

RTR actualitad 07:00

Artitgels legids il pli savens

Scrollar a sanestra Scrollar a dretga