La chasa da lain e betun cun la plachetta «Lehrkraftwerk Churwalden» beneventa ils 13 uffants che vulan emprender dapli davart energia. Accumpagnads ed instruids vegnan els dal docent ed expert d'energia Patrik Janett da la Scola auta spezialisada dal Grischun. Dentant, tut nov n'è il tema energia betg per ils scolars e las scolaras.
Intgins dad els han gì quest tema en scola. Auters han ils geniturs che lavuran en in'interpresa che producescha energia:
Jau sai ch'ins po producir electricitad cun ina turbina d'aua.
Ed exact uschia ina turbina, ina turbina da pelton, pon ils uffants guardar a Churwalden en l'ovra da demonstraziun electrica. Quella turbina vegn savens duvrada en cumbinaziun cun aua d'in lai da fermada.
Gnanc uschè simpel da reglar l'electricitad
Ils uffants na dastgan dentant betg mo guardar, mabain era gist pruvar sez. Els ston pruvar da reglar l'electricitad da la turbina uschia ch'ella producescha avunda per far arder ils pairs electrics da l'autra vart da la stanza. Ma quai n'è gnanc uschè simpel, ina giada èsi da memia, ina giada memia pauc electricitad.
Tuttina, els hajan emprendì bler quest di, dian ils uffants. E han la saira segir bler da raquintar a lur geniturs.