Da curt ha l'ambassadur da l'organisaziun «Bündner helfen Bündnern», cusseglier naziunal Martin Candinas, surdà a l'uniun Momo da Glion il premi «Da Tempus». Quel ha ella retschavì per ses engaschament caritativ e social per uffants hospitalisads.
«Igl è ina bella renconuschientscha per noss giubileum da diesch onns», remarca Valentina Montalta. Ensemen cun ina gruppa da persunas è la dunna da Glion stada envidada da curt a Cuira – per ina chaschun speziala. Avant diesch onns, il mars 2015, ha ella fundà ensemen cun ina gruppa da persunas l'uniun Momo. Anc oz presidiescha ella quella. A chaschun da la saira annuala da l'organisaziun «Bündner helfen Bündnern» ha Valentina Montalta prendì encunter per sia uniun in premi prestigius.
«Insatgi ha annunzià nus»
L'organisaziun ha surdà per la tschintgavla giada ils premis grischuns per la lavur communabla ed in engaschament social en favur da glieud basegnusa. Il num da l'uniun Momo sa basa sin il cudesch d'uffants da Michael Ende che raquinta da la mattatscha Momo che regala ses temp ad auters.
Intent da l'uniun cun sedia a Glion è da regalar temp ad uffants che piteschan da differentas malsognas e ston star pli ditg en ospital. «Per quai ans engaschain nus adina», declara Ladina Volken, ina giuvna mamma e suprastanta da l'uniun. E Nicole Arpagaus, l'actuara e mamma d'uffants da scola, agiunta: «L'uniun survegn grond sustegn da tuttas varts.» Insatgi haja annunzià lur uniun per il premi grischun. Ellas na sappian betg tgi, dentant dettia quella distincziun blera cuntentientscha e motivaziun, tradescha Valentina Montalta.
Il grond sustegn pudess motivar betg mo las trais suprastontas. Sco quai che Valentina Montalta infurmescha en il discurs cun la FMR, dumbra l'uniun actualmain passa 120 persunas, firmas, fauturas e donaturs. Mintgina gida cun ina contribuziun annuala fixa u cun ina donaziun. L'uniun cun il logo da la mattetta Momo e l'ura è preschenta dapi la fundaziun a diversas occurrenzas. Ella è daventada enconuschenta cun il stan da fiera per rimnar daners, cun activitads da zambergiar e sairas da concert.
Pergamina «Da Tempus»
Dapi la fundaziun s'engascha l'uniun en il Spital chantunal a Cuira. Grazia al sustegn cuntinuà da tuttas varts po l'uniun finanziar ina scolasta ed ina mussadra da scoletta en la partiziun pediatrica. Quellas pedagogas regalian als uffants e giuvenils fin 18 onns temp, cun zambergiar e far gieus, raquintar istorgias, chantar e far musica, ir a spass, discutar e bler auter. Era ina gruppa da voluntarias è sa furmada. Persunas da quella vegnan en acziun sche la scolasta u la mussadra en il spital chantunal ha vacanzas. Per ina fin trais uras substitueschan mintgamai voluntarias e voluntaris las persunas d'assistenza en la partiziun staziunara, en l'ambulatori ed en il numnà Schlupfhaus dal spital chantunal.
Martin Candinas, dapi onn passà in dals ambassadurs da «Bündner helfen Bündnern», ha pudì surdar a Valentina Montalta la pergamina enramada cun la distincziun «Da Tempus». «Vossa lavur voluntaria è exemplarica per tuts», ha il cusseglier naziunal declerà. En sia laudatio ha el menziunà spezialmain l'engaschament e la prestaziun da l'uniun Momo. «Nus apprezziain fitg il grond sustegn che nus survegnin adina puspè da la populaziun. In grond engraziament per quai», punctuescha Valentina Montalta. La presidenta possia garantir che mintga franc che l'uniun Momo retschevia, vegnia duvrà per ils uffants en il spital.