L'um ch'è vegnì spendrà la gievgia d'in chaun da lavinas e reanimà è questa damaun mort en l'ospital. Quai ha communitgà la Polizia chantunala.
Quai è capità
Ad Arosa è ina lavina ida giu ordaifer il territori da skis al Schafrügg la gievgia. Sco la Polizia chantunala scriva han pliras persunas observà l’incident. En acziun èn tranter auter stads trais helicopters, spezialists da Club alpin svizzer e da la Polizia chantunala e trais chauns da lavinas. In dals chauns ha lura chattà in um da 64 onns che la crew da la Rega ha pudì reanimar e transportar en l’Ospital chantunal a Cuira.
Spendrà camarat a Tavau
Gievgia suentermezdi è ina lavina ida giu ordaifer il territori da skis Pischa a Tavau. In um da 55 onns che fascheva ina tura da skis è vegnì sepulì. Ses camarat ha chattà el e pudì chavar ora el. Ils umens èn vegnids sgulads en l’ospital.
Ina ulteriura lavina è ida giu a Meierhofer Tälli ordaifer la regiun da skis Parsenn. Suenter tschertgas cun apparats da tschertgar LVS, chauns e stangas da sondar n'han ins dentant chattà nagins indizis ch’i haja dà persunas sepulidas.
Or da l'Archiv, sur da la vita d'in chaun da salvament: