Siglir tar il cuntegn

Header

audio
Energia: Blers temas ord ura da dumondas
Or da Actualitad dals 19.10.2022. Bild: RTR
laschar ir. Durada: 4 minutas 37 Secundas.
cuntegn

Ura da dumondas Cussegl grond Las pli impurtantas respostas davart energia

Tge capita cun ospitals sch'i dat ina mancanza d'energia? Tge plan ha il chantun per proteger en il mender cas infrastructuras impurtantas sco il provediment d'aua? Cusseglier guvernativ Mario Cavigelli ha dà respostas tar las pli impurtantas dumondas davart l'energia.

Spargnar energia, quai fatschenta il mument tuts – er la politica. Numerusas deputadas e deputads han oz en l'ura da dumondas perquai vulì scleriment dal Cussegl grond davart differents temas en connex cun l'energia. Il minister d'energia Mario Cavigelli ha dà respostas:

Tge prevesa la regenza da far per persvader dapli persunas da spargnar energia? I n'è betg prevesì da far sin livel chantunal ulteriuras campagnas da sensibilisaziun. Il chantun vul dentant ir ordavant cun in bun exempel e vul sez spargnar 10 enfin 15% energia.

Ha il chantun in plan per evitar ina mancanza d'energia? Ils plans èn fitg cumplex perquai ch'els pertutgan ina gronda part da la societad. Ina gronda part da l'infrastructura pertutgada è sut la bitgetta da las vischnancas, perquai è il chantun vid elavurar in manual per las vischnancas cun recumondaziuns co ir enturn cun la situaziun speziala.

Datti plans d'urgenza per spitals ubain chasas da tgira per il cas d'ina mancanza d'energia? I dat differenta infrastructura relevanta al sistem. I na saja dentant betg garantì che tut las infrastructuras survegnan electricitad. La selecziun fa la Confederaziun. Sco emprim vegnan spitals resguardads, dentant per las chasas da tgira n'è quai anc betg garantì. Dentant: Quasi tut las instituziuns han in plan d'urgenza ed er la pussaivladad da far electricitad cun in generatur.

Datti in tetg da protecziun per occurrenzas grondas sco il Spengler Cup ubain il Forum mundial d'economia che pudessan vegnir unfrendas dals pretschs auts d'electricitad? Sche l'electricitad vegnia stizzada en disfavur da las occurenzas grondas, sche vegnia quella stizzada per l'entira regiun, er per hotels e gastronomia etc. Quai fiss in grond donn ch'il chantun na possia anc betg stimar en cifras.

Tge influenza han ils pretschs d'energia sin l'economia dal chantun? Cunzunt per interpresas che cumpran lur energia sin la fiera libra? Il chantun ha incumbensà la Scol'auta spezialisada dal Grischun da far in studi davart l'impurtanza economica da la furniziun d'energia oravant tut en regiuns turisticas. Il studi duai er mussar, tge e quantas fatschentas che sajan insumma pertutgadas.

Tge fa il chantun per pudair laschar ir uschè ditg sco pussaivel pendicularas? Sche l'energia vegniss stizzada, saja quai ina decisiun da la Confederaziun da decider co enavant e co indemnisar il donn. E lura vegissan sco tar Covid er ils chantuns dumandads da s'integrar en la discussiun.

RTR actualitad 12:00

Artitgels legids il pli savens

Scrollar a sanestra Scrollar a dretga