Atgnamain fissi sta planisà da far in festival cun workshops, DJs ed animaziun. Pervia dal coronavirus n'èsi dentant betg stà pussaivel da far quai en in grond rom. Fabian Florin alias Bane n’ha betg cumplettamain vulì annullar il festival ed ha perquai realisà quel en in rom pli pitschen.
Paraid legala grazia a la citad da Cuira
Sco Fabian Florin ha declerà a RTR ha la citad sustegnì fermamain il project. Uschia haja ella mess a disposiziun ina paraid che vegnia uschè u uschia stgarpada giu ils proxims onns. Sut circumstanzas legalas hajan ils artists pia pudì viver or lur fantasias.
Il graffiti è sa sviluppà. Oz sa numna quai Urban Art
Fin sentiment e concentraziun
Ils maletgs che sa sviluppan durant la fin d'emna èn fatgs cun premura. In artist per exempel lavura a moda fina in purtret d’ina dunna. Entras lingias finas cun il spray da colur survegn la dunna ina parita realistica. «Bax» sa numna l'artist. El è vegnì da Berna per pudair malegiar vid la paraid.
