Ils ultims onns è Cuira creschida. Vegnids vitiers èn Haldenstein, Maladers a Tschiertschen-Praden, uschia che Cuira ha actualmain tschintg differentas leschas da bajegiar. Quai dess vegnir unifitgà. Vitiers vegnan adattaziuns al dretg surordinà chantunal e naziunal.
La revisiun da l'urden fundamental saja in project da generaziuns, di il cusseglier da la citad responsabel Simon Gredig. Perquai ch'il project saja usche grond e cumplex, ha la suprastanza actuala da la citad decidì d'agir auter ch'ils antecessurs: Enstagl da duas fasas datti uss trais fasas da la revisiun.
Messadi per l'emprima da trais fasas sin maisa
Tar set temas centrals èn vegnidas elavuradas maximas da basa sco per exempel zonas da planisaziun, mobilisaziun da terren da bajegiar u dentificaziun. Il messadi per quell'emprima fasa è ussa sin maisa. Il zercladur decida il parlament da Cuira sch'els èn d'accord cun il plan da la suprastanza. Sch'il parlament di Gea elavura l'administraziun sco proxim pass mesiras concretas. Lura duai la populaziun avair l'ultim pled en chaussa. La revisiun pertutga numnadamain in e scadina da Cuira. Simon Gredig di, ch'i saja fitg impurtant che tut ils interess vegnian udids.
Nus vulain ch'ina uschè gronda part sco pussaivel da la populaziun da Cuira ha sia vusch en chapitel.
Mo sch'ins haja in maletg dals differents interess durant la revisiun, possian ins elavurar ina proposta che vegnia acceptada da la populaziun. Perquai ha la citad installà ina pagina d'internet, nua ch'ins po sa participar a moda e maniera digitala. Perquai che la revisiun da l'urden fundamental saja abstracta, saja tant pli impurtant che la populaziun possia sa participar e saja infurmada.
I va anc in pèr onns
Fin ch'il nov urden fundamental da Cuira vegn ad esser sut tetg, datti anc ina massa lavur - e quai cuzza anc in pulit mument. In'emprima votaziun davart la basa che duai reglar, nua e co ch'ins po bajegiar a Cuira e prevesida per il mars 2028. La decisiun finala a l'urna vegn ad esser il mars 2029.