A Tavau èn giasts da vacanzas vegnids surprendids mardi suentermezdi d'ina malaura. Ina persuna è vegnida blessada ed ha stuì vegnir transportada en l'ospital. La famiglia da trais persunas da la Frantscha sa chattava sin la senda da viandar en la chavorgia dal Zügen vers Tavau Glaris, cura ch'in urizi ha cumenzà. Lavurers da construcziun han observà co che pliras plantas èn cupitgadas curt suenter las 15:00 e crudadas cun crappa sin la senda da viandar, uschia ch'il bab da famiglia è vegnì blessà. Els han alarmà las forzas da salvament e dà emprim agid. La Rega ha sgulà l'um da 70 onns mez grev blessà en l'Ospital chantunal dal Grischun a Cuira. La mamma ed il figl èn vegnids transportads a l'ospital a Tavau per controlla.
Interrut lingias da tren e derschì plantas
La Viafier retica ha laschà ir bus enstagl da trens sin ils trajects tranter Cuira ed Arosa, tranter Scuol ed Ardez e tranter Filisur e Tavau Platz. Sin la lingia da l'Alvra è il traject tranter Bravuogn e Preda stà interrut suenter urizis anc fin mesemna las 08:00.
Sagogn, Valendau e Carrera senza electricitad
Ina planta derschida sin ina lingia d'electricitad ha interrut l'electricitad las 14:16 il mardi. En tut èn 1'160 persunas stadas pertutgadas per 37 minutas. Quai communitgescha la Repower.
Ardez
En il guaud en vischinanza da Sur-En (Ardez) ha ferm vent derschì pliras plantas. L'uffizi da guaud e privels da natira è stà avant lieu ed ha confermà envers RTR, che 2 fin 3 hectaras èn pertutgadas. La via champestra tranter Giarsun e Sur-En d'Ardez è serrada, ha la vischnanca da Scuol annunzià.
Incaps er a Flem
A Flem è tenor il «Blick» crudà roma sin la suga d'atschal da las pendicularas. Singulas persunas han stuì vegnir evacuadas or da las cabinas. Autras persunas han stuì spetgar pli ditg che duas uras fin ch'ellas han pudì sortir las cabinas.
Tenor la «Südostschweiz» ha Meteo centrale registrà in urizi cun stgalim cotschen per Laax las 16:15. L'urizi saja vegnì dal vest cun sveltezza da 79 kilometers per ura, ed igl haja dà blers chametgs.
Or da l'archiv:
