La chalur persa, en furma d'aua chauda, da l'Ems-Chemia e l'Axpo Tegra a Domat va actualmain direct en il Rain. Quai senza avair duvrà questa energia che fiss atgnamain avant maun.
La gievgia ha la «Wärmeverbund Domat/Ems» SA – in'uniun da la vischnanca da Domat, la IBC e la Rhiienergie SA, dentant fatg quest pass. Cun l'emprima badigliada en la zona d'industria da Domat. Là vegn uss bajegià l'indriz che utilisescha l'aua chauda industriala per stgaudar differentas chasadas privatas, sco era p.ex. la scola u il bogn cuvert da Domat. Planisà è quai a partir da quest atun.
Spargnar 3,5 milliuns francs
Cun midar d'ieli da stgaudar sin stgaudar cun chalur persa vulan els fin l'onn 2030 spargnar 3,5 milliuns liters ieli – ed uschia var 11'000 tonnas emissiuns da CO2. In'opziun pli persistenta che ha dentant er ses pretsch. Las chasadas che midan sin quella moda da stgaudar pajassan 10% dapli che per l'ieli. Tenor il president communal Erich Kohler ed il president da la vischnanca burgaisa Theo Haas saja quai – en vista al midament dal clima – dentant en mintga cas in pretsch ch'i valia da pajar.
TR Telesguard 17:40