Siglir tar il cuntegn

Header

audio
Protecziun d'utschels: Project da pilot sistì
Or da Actualitad dals 05.04.2023. Maletg: Keystone
laschar ir. Durada: 2 minutas 33 Secundas.
cuntegn

Utschels e parasguladers Sistì project da pilot

Per ch'ils utschels na vegnian betg pli disturbads dals parasguladers durant il temp da cuar hai dà in project da pilot en il Grischun. Quel project è dentant vegnì sistì.

En il Grischun cuan intgins utschels sco l'evla da la pizza ed il falcun pelegrin en paraids-crap stippas. Pilots e pilotas da parasguladers van er là a sgular, perquai che la termica è là ideala. Las siluettas dals parasguladers disturban dentant ils utschels durant il cuar.

Project da pilot en il Grischun

Perquai che l'uniun da parasguladers (SHV) ha percorsch il conflict tranter ils utschels ed ils sportist ha l'uniun lantschà ensemen cun la staziun ornitologica ed l'Uffizi da chatscha e pestga in project da pilot: Sch'in guardiaselvaschina vesa in pèrin da l'evla da la pizza u falcun pelegrin che cua en in territori, nua ch'i ha blers parasguladers, infurmescha el l'uniun svizra da parasguladers e la staziun ornitologica. Lura vegn definì in territori da protecziun en furma da cilinder e nua ch'i na duai betg pli vegnir sgulà. Las scolas ed ils clubs da parasguladers infurmeschan lura ils pilots e las pilotas davart quests territoris. Da sviar ils territoris è dentant voluntari per ils pilots e las pilotas.

Project sistì

Strusch ch'il project aveva cumenzà el schon puspè passà: La fin da l'emna passada ha l'Uniun svizra dals parasguladers publitgà in curt avis sin sia pagina d'internet. I vegn communitgà che l'impundiment saja daventà memia grond, ins haja sistì il project. Suenter avair activà las emprimas duas zonas da protecziun hajan blers commembers e commembras s'annunzià tar l'uniun ed hajan annunzià dubis. Quel dumber da dumondas n'haja l'uniun betg pudì dumagnar cun las resursas da persunal disponiblas, di il responsabel per la communicaziun Oliver Kuhn. Perquai as haja decidì ensemen cun il post ornitologic da sistir il project per quella stagiun. Quant gronda che la part dals pilots e las pilotas saja ch'èn encnuter il project na possian ins betg dir exact. Tar las occurenzas nua ch'ins haja discurrì dal project da pilot haja quai anc tunà tut auter. Ins veglia uss anc ina giada s'avischinar als commembers e las commembras da l'uniun da parasguladers ed anc ina giada declerar tge ch'ins veglia cuntanscher cun quel project e sco ch'igl vess da funcziunar. Surtut as stoppia communitgar pli cler che las zonas da protecziun sajan voluntarias per ils pilots e las pilotas.

RTR actualitad 17:00

Artitgels legids il pli savens