L'uvestg da Cuira, Vitus Huonder, vul sa fatschentar ils proxims dus onns tranter auter cun la dumonda, schebain i duai dar en l'avegnir in uvestgieu da Turitg. Uschia hai num en ina communicaziun dal uvestgieu.
La corporaziun catolic-romana da Turitg aveva giavischà l’onn 2012 da divider l’uvestgieu da Cuira e stgaffir in nov uvestgieu Turitg. Per consequenza hajan ins fatg sin quai ina vasta consultaziun e plirs discurs cun represchentants da las corporaziuns ecclesiasticas chantunalas e naziunalas.
Discussiuns interruttas pervia da la demissiun
Pervi da la demissiun planisada dal uvestg Vitus Huonder eran ils discurs davart quest tema vegnì interruts. Damai ch'el haja ussa puspè dus onns segirtad da planisaziun, veglia Huonder danovamain sa fatschentar cun la dumonda da divider l’uvestgieu.
L'uvestg Vitus Huonder aveva inoltrà sia demissiun sco quai ch'il dretg ecclesiastic prevesa, il di da ses 75avel anniversari l'avrigl. L’entschatta matg ha papa Francestg lura prolungà il temps d’uffizi dal uvestg per dus onns.
RR novitads 14:00