La retschertga vegn fatga en concordanza cun il nunzi dal vatican en Svizra, scriva l’uvestgieu da Cuira en ina communicaziun. Ils resultats duain lura mussar, sch’il uvestgieu duai prender a mauns il project d’in uvestgieu da Turitg ubetg.
Il giavisch d'in agen uvestgieu da Turitg è gia pli vegl. Il 1990 avevan ils Turitgais gia ina giada tramess ina dumonda uffiziala, dentant mai survegnì ina resposta. Il 2012 ha la corporaziun catolic-romana dal chantun Turitg lura puspè lantschà il project.
Tenuta dal uvestg ha sa midà
Cun quai ch’i vegn elegì en in onn in nov uvestg, haja la tenuta da l'uvestg Vitus Huonder sa midà, ha ses pledader Giuseppe Gracia ditg envers RTR. Uschia saja Huonder uss pli neutral che pli baud, e possia cunquai prender a mauns in tal project.
Sco Gracia di enavant, saja l’avis dal Vatican ch’il project uvestgieu Turitg stoppia vegnir examinà da las persunas avant lieu. Sur dals resultats duai la publicitad vegnir infurmada la fin d’avrigl.
L'uvestgieu da Cuira en cifras (funtauna:uvestgieu Cuira, mars 2016)
| chantun | crettaivels | plaivs |
|---|---|---|
| GR | 90'000 | 104 |
| GL | 12'000 | 8 |
| SZ/UR/OW/NW | 190'000 | 101 |
| ZH | 394'000 | 96 + 20 missiuns linguisticas |
L’uvestgieu da Cuira è vegnì fundà probablamain il 4. tschientaner. Dapli lura haja adina danovamain dà midaments en ses territori, scriva l’uvestgieu en in fegl dad infurmaziun davart il svilup istoric da l'uvestgieu da Cuira. Dapli che la mesadad dals crettaivels da l’uvestgieu da Cuira stat en il chantun Turitg.
RR novitads 08:00