Dus vicaris sa retiran en l'uvestgieu da Cuira. Suenter esser sulet dus onns en uffizi demissiunescha il vicari general per la regiun Grischun, Jürg Stuker. Sco el ha ditg envers il center da medias catolic, kath.ch laschia el encrescher per la lavur concreta en la plaiv ed ils contacts.
Sin la dumonda sch'igl haja dà conflicts en il ordinariat, ha Stuker ditg Na. El haja gì ina buna relaziun cun l'uvestg Joseph Maria Bonnemain, cun il cussegl da la diocesa e cun tut ils collavuraturs. Era cun las structuras dualas n'haja el gì nagins problems. Sco kath.ch scriva haja dà vuschs che hajan ditg che Stuker na saja betg stà adattà per quest uffizi. Sco Stuker ha ditg sez saja ses interess e sia motivaziun en la lavur conreta en la plaiv.
Era il vicari Andreas Fuchs demissiunescha
Era suenter dus onns demissiunescha Andreas Fuchs sco vicari da l'uvestg. Era el vul reprender la lavur da pastoraziun en ina plaiv. En tut è el stà 12 onns en il ordinariat. Era el ha negà sin la dumonda sch'igl haja dà conflicts.
Plinavant ha Fuchs confermà envers kath.ch ch'el na vegnia er betg pli ad operar sco canoni. Uschia ha questa midada da plazza era effects sin la cumposiziun dal chapitel catedral. Per la proxima elecziun dal uvestg saja quai impurtant cunquai che Andreas Fuchs saja stà in represchentant dal champ conservativ.