Siglir tar il cuntegn

Header

cuntegn

Vacanzas da stad Grezia e Spagna èn las destinaziuns las pli tschertgadas

Blers pajais han schlià lur restricziuns da corona e suenter dus onns ch'ins è stà restrenschì han blers puspè il desideri da passentar las vacanzas en in pajais ester. Quest onn èn cunzunt las inslas enturn Spagna e la Grezia tschertgadas.

Ils biros da viadi Capricorn a Glion, Traveller e Kuoni a Cuira han blera lavur. Che la glieud ha puspè gust dad ir en vacanzas en l'exteriur sentan er els. Las pli bleras cudeschaziuns han els per ils pajais Grezia e Spagna. Pli exact per las inslas enturn: Creta, Rhodos, Mykonos en Grezia ed en Spagna cunzunt Mallorca.

Paucas restricziuns en Grezia e Spagna

Sco bunamain l'entira Europa ha era la Grezia e la Spagna il mument be paucas restricziuns da corona. Per entrar en Spagna ston ins bain anc mussar il certificat da corona, ma persuenter ston ins be purtar la mascrina en il traffic public. En Grezia pon ins viagiar senza certificat da corona, ma ins sto purtar la mascrina en tut ils locals publics.

Sch'ins guarda in zichel pli lunsch èn era ils Stadis Unids puspè tschertgads tar ils Grischuns e las Grischunas, di Gian Marco Caderas dal biro da viadi Traveller. Plinavant era Canada, Mexico, Costa Rica e la Caribica. Il continent Asia percunter n'è betg uschè tschertgà sco avant la pandemia. Quai haja da far cun las stretgas restricziuns da corona, din ils trais biros da viadi. En pajais sco China u Giapun na pon ins anc adina betg viagiar.

audio
Nua van Grischunas e Grischuns?
aus Actualitad vom 10.05.2022.
abspielen. Laufzeit 2 minutas 30 Sekunden.

Clients e clientas novas

Ils trais biros da viadi din tuts ch'els hajan blera lavur. Dentant clients e clientas novas, gliez n'han betg tuts. Gian Marco Caderas da Kuoni di, ch'i saja be en la teoria uschia che la glieud giaja suenter la pandemia en in biro da viadi per cudeschar las vacanzas. Els hajan be 10% clientella nova. Forsa er perquai ch'els hajan gia avant la pandemia gì blers clients regulars. Tschels dus biros da viadi dastgan omadus beneventar dapli novs clients e clientas.

audio
Biros da viadi – quant dumandads?
aus Actualitad vom 10.05.2022.
abspielen. Laufzeit 2 minutas 43 Sekunden.

Er viadis da lingua èn tschertgads

Emprender englais a Brighton, franzos a Montpellier u talian a Firenza. Ins di gea, emprender ina lingua fan ins il meglier cun discurrer cun ils indigens. Far quai pon ins per exempel sin in viadi da lingua. Er quels èn pli tschertgads suenter che blers pajais han schlià las restricziuns da corona. Quai senta era la fatschenta Boa Lingua che porscha viadis da lingua per l'entira Svizra e ch'ha era ina sedia a Cuira.

audio
Viadis da lingua – suenter corona puspè dumandads
aus Actualitad vom 10.05.2022.
abspielen. Laufzeit 2 minutas 22 Sekunden.
Questa stad vegni cunzunt fatg viadis en ils Stadis Unids ed a Canada. En l'Europa cunzunt en l'Engalterra ed en l'Irlanda.
Autur: Christian Graf CEO Boa Lingua

Ma er en il Sid da la Frantscha e da l'Italia van ils clients e las clientas gugent. Er spagnol saja popular, di il mainafatschenta Christian Graf. Tar ils Svizzers e Svizras bunamain uschè popular sco talian e franzos. Englais restia dentant la lingua numer 1.

Australia e la Nova Zelanda dovran anc temp

Sco Christian Graf di, saja puspè quasi uschè simpel da far viadis da lingua sco avant la pandemia. Tuttina dovrian pajais sco l'Australia e la Nova Zelanda, ch'èn stads serrads ditg, anc in mument fin ch'els hajan puspè tants viagiaturs sco avant dus onns. L'entira branscha da viadi saja stada pertutgada fitg da la crisa da corona e perquai, di Christian Graf, sajan els leds ch'i giaja ussa puspè ensi.

RTR actualitad 07:00

Artitgels legids il pli savens

Scrollar a sanestra Scrollar a dretga