Sco mintg'onn èn ils classichers enturn la mar mediterrana sco la Spagna, la Grezia e l'Italia en il trend. Sper quai sa mussa dentant er ch'ils Grischuns e las Grischunas vulan puspè viagiar pli lunsch davent. Viadis en l'Asia, l'America e l'Africa vegnan puspè cudeschads dapli. Quai mussa ina retschertga dad RTR tar differents biros da viadi a Cuira, Tusaun, san Murezzan e Glion.
Desideri da prender suenter
Las cifras da cudeschaziuns sajan sin buna via vers il livel d'avant la pandemia e per part schizunt gia sur quel. En general pon ins dir, ch'ils biros da viadi sentan tar lur clientella gronds basegns da cumpensar il mancament da viagiar. Qua sa mussa betg sulettamain vi da las cifras da cudeschaziuns, ma er tar il budget da vacanzas: Tendenzialmain sentia ins, che la glieud dettia ora dapli raps per las vacanzas e sa cuescha insatge.
