Siglir tar il cuntegn

Header

Stan da las lavurs la mesemna
Legenda: Stan da las lavurs la mesemna Uffizi da construcziun bassa grischun
cuntegn

Val Calanca Via averta sin in vial

Tranter Castaneda e Buseno en la Val Calanca ha ina crudada da crappa donnegià dumengia la damaun la via da Calanca. I vegn fatg lavurs da rumida. Dapi il venderdi saira è la via averta sin in vial.

Il mardi han las lavurs per la rumida da la via da Calanca cumenzà nà da duas varts da la bova, scriva il chantun. Las lavurs èn vegnidas terminadas pli baud che planisà. Er las palissadas da protecziun da la vart da la muntogna èn gia installadas. La via è vegnida meglierada provisoricamain cun sablun grop ed è puspè averta davent dal venderdi a las 16.00 sin in vial.

Mesiras da segirtad per la via

Avrir la box Serrar la box

Lavureras e lavurers dal chantun fitgan palissadas da protecziun sur la via sin ina lunghezza da radund 50 meters. Las construcziuns d'atschal han in'autezza da radund dus meters e pon tenor il chantun tegnair enavos crappa crudanta cun in diameter da circa in mez meter.

Quai è capità:

Ina dunna ha clamà la polizia la dumengia a bun’ura, perquai ch’ella ha udì in sfratg dad aut e vis fim. Tenor examinaziuns da l’uffizi da construcziun bassa n’èn naginas persunas sutterradas. Ma la via è donnegiada e serrada senza pussaivladad da guntgir a temp nundeterminà. La proxima annunzia davart la situaziun è planisada per mardi a las 11:00.

Crudada da crappa 360 meters sur la via da Calanca.
Legenda: Crudada da crappa 360 meters sur la via da Calanca. BauGrundRisk GmbH

Crappa or da 360 meters autezza

Tenor stimaziuns dal chantun èn sa distatgads var 600 meters cubic material or da la paraid da grip. Il material è sa distatgà 360 meters sur la via. La crappa ch'è crudada ha donnegià per part fermamain la via, ils mirs da sustegn sco er il cordun dal mir sin ina lunghezza da var 30 meters.

video
Crudada da crappa en Val Calanca
Or da Telesguard dals 05.12.2022.
laschar ir. Durada: 1 minuta 55 Secundas.

Vischnanca da Calanca isolada

Il president communal da Calanca, Anton Theus di, ch'i sajan differentas chaussas che na giajan per il mument betg: ils uffants na possian betg ir a scola, tgi che haja in termin ordaifer la val stoppia desister da quel. Per cumprar en la rauba la pli impurtanta han ins duas-trais pitschnas butias en la val. Els hajan però er schon discutà co ins pudess transportar per exempel paun frestg en la val ubain drizzar en in numer da telefon u in post d'infurmaziun per la populaziun. Sch'i dess cas urgents medicinals fiss l'access via helicopter pussaivel.

RTR novitads 09:00

Artitgels legids il pli savens

Scrollar a sanestra Scrollar a dretga