In um da la Slowachia (29) ed in da l’Italia (33) vulevan ir a rampignar entadim la Val Stussavgia. Sin in autezza da 1’800 meters, amez las navadas, èn els vegnids en ina lavina spontana ch’ha cuvrids els dil tuttafatg.
Suenter ch’ils confamigliars avevan annunzià lur scumparsa, han las forzas d’agid da la secziun SAC Piz Terri e la staziun da salvament Stussavgia chattà els la dumengia avantmezdi. Las lavurs da tschertga eran difficilas cun quai ch’il privel da lavinas è creschì anc vi pel di.
Diversas lavinas spontanas
La sonda avantmezdi haja dat pliras lavinas tar Tavau Glaris ed en Stussavgia. 4 persunas èn vegnidas en lavinas. A tuts 4 èsi reuschi da sa deliberar sez. Ina persuna è sa blessada levamain.
Era en la regiun da skis Corvatsch a Surlej è in um vegnì en lavina dador las pistas marcadas. A persunas, ch’eran en vischinanza, èsi retuschi, da salvar el. L’um s’è blessà levamain ed è vegni sgulà da la Rega en l’ospital Samedan.
Privel da lavinas grond
Causa da las grondas navadas e vents ferms aveva l’Institut federal per la perscrutaziun da naiv e lavinas SLF a Tavau admoni la fin d’emna dal privel da lavinas. En il sid aveva il SLF annunzià cul staglim 4 schizunt grond privel da lavinas. Staglim 4 vegn mo annunzià en 2% dals cas dad in enviern.
RR novitads 12:00