Las taxas per la valitaziun d'investiziuns fatgas, sco era ils custs per l'invista en acts vegnan reducids, sco la regenza communitgescha. Plinavant vegn la taxa maximala da 25'000 francs reducida sin 15'000 francs ed il rabat tar autas taxas auzà per passa 30%.
Tar valitaziuns da revisiun senza grondas investiziuns, quai munta cun custs sut 100'000 francs, na datti vinavant nagin quint per possessur u possessura. Sco la regenza scriva saja quai il cas tar las pli bleras valitaziuns.
La regenza ha er adattà ils criteris per l'inspecziun tar valitaziuns uffizialas. Finamira saja da far in'inspecziun entras in expert u experta, là nua ch'i dettia ina plivalur ord vista d'assicuranzas u per la valitaziun.
