Bundant 400 purs quintava la Val Poschiavo anc avant 100 onns. Oz èn anc 70 «cuntadins» en la val taliana. Tenor il president da la societad agricula Valposchiavo, Pierino Rada, sa tracti entant da bains purils pli gronds ch'anc avant in pèr decennis. La surfatscha dals prads en val saja sa diminuida marcant.
Concurrenza dador cunfin
Ils quitads dals purs puschlavins sumeglian da principi a quels da lur auters collegas svizzers. Dentant han ils «cuntadins» da la Valposchiavo er da cumbatter cunter la concurrenza ch'è da l'autra vart dal cunfin talian e porschan charn e products da latg pli favuraivels. Perquai mettian ils purs en la val grond pais sin la qualitad.
100% Valposchiavo
Baud 90% dals bains purils hajan entant ina producziun da bio e fetschian er part al label 100% Valposchiavo, uschia Rada. Allegraivel saja er ch’i haja dà pli u main tar tut ils bains purils in midament da generaziun. El sez saja cun 61 onns in dals pli vegls «cuntadins» en val.
Fiera e festa
En occasiun dal giubileum da 100 onns societad agricula Valposchiavo, envida l’uniun la sonda ad in grond inscunter en val. Dad ina vart datti ina fiera da muvel, da l’autra attracziuns e festa en tenda per tuts.
Che la data da la festa da giubileum, ils 28 d’avrigl 2018 sa cruscha cun quella da la societad agricula Val Müstair che festivescha er il 100avel anniversari, saja ina tuppa coincidenza, ha admess il president da « l’Associazione Agricola Poschiavo».
RR actualitad 07:00