Siglir tar il cuntegn
cuntegn

Valladas talianas 22 milliuns: Bondo ha gronds plans

Per 22 milliuns francs vegn la zona, ch'era vegnida destruida da las bovas a Bondo, reconstruida. Per anc dapli segirtad vegn investì en la via chantunala ed en punts novas.

Legenda: Guardar il video Bondo ha gronds plans. Durada 01:27 minutas.
Or da RTR dals 28.11.2018.

A chaschun da la radunanza communala han ils responsabels infurmà davart ils plans futurs a Bondo. I duai dar trais novas punts ed ina rundella . La via chantunala vegn auzada per enfin dus meters. Uschia saja la vischnanca en il futur protegida anc meglier.

Ils custs da 22,3 milliuns vegnan repartids sin Confederaziun, chantun e vischnanca. La cumpart da la vischnanca Bregaglia è tar 6,9 milliuns francs. Las lavurs cumenzan l'onn 2020/21 e duran trais onns.

Piz Cengalo na vegn betg pli surveglià permanentamain

La Val Bondasca è e resta serrada. Cunquai ch'i n'ha dapi il settember betg pli dà moviment al Piz Cengalo, na vegn el quest enviern betg pli surveglià permanentamain. Ils indrizs d'alarm restan vinavant, uschia saja tenor ils responsabels la segirtad da la populaziun vinavant garantida.

La survista dals eveniments a Bondo

RR actualitad 17:00