23 empè da 21 onns praschun per Valtellinais

Il Tribunal da Milaun ha confermà, sco spetgà, il chasti a vita duranta per l’um da la Moldavia che ha mazzacrà in pèr da Zalende, ina fracziun da Brusio, il november 2010. Il Tribunal ha schizunt augmentà la sentenzia da 21 sin 23 onns praschun.

Giatter porta Bild in Lightbox öffnen.

Legenda da maletgs: Las examinaziuns en il cas dal omicidi crudel en la Val Puschlav èn gia terminadas. Tipress

En emprima instanza aveva il Tribunal da Sondrio condemnà il december 2014 l’um da la Vuclina a 21 onns praschun. Quai per avair ordinà il mazzament crudel dal pèr puschlavin.

Tratg vinavant il cas

La Procura publica da Sondrio aveva silsuenter pretendì er per l'um da la Vuclina in chasti a vita duranta ed ha perquai tratg vinavant il cas a Milaun. La defensiun dals dus umens aveva pretendì d'als declerar nunculpant causa provas da DNA insuffizientas.

Tribunal da Milaun conferma sentenzia

Sco quai che Radiotelevisione Svizzera (RSI) Italiana rapporta, na crai il Tribunal da Milaun betg a l’incumbensader. Lez aveva pretendì ch'el na savevi betg che l’um da la Moldavia portia in'arma durant il delict. Perquai ha la «Corte d’assise d’appello di Milano» confermà la culpaivladad ed augmentà il chasti da l'um da la Vuclina.

Ultima instanza pussaivla

Tenor RSI hajan las partidas gia annunzià da vulair far recurs e trair vinavant il cas dal dubel murdraretsch da Zalende fin davant l’ultima instanza en l'Italia, la Dretgira da cassaziun a Roma.

RR novitads 16:00