Adina puspè vuschs criticas or dal Puschlav

Gia tar la realisaziun da la basa per il mantegniment da vias dal district 3 a Li Curt avevi dà pleds critics envers il project dal chantun Grischun. Uss che quel è a fin, ha il president communal dal Puschlav da dar respostas a reguard il project sin il Pass dal Bernina.

baghetg sper via. Bild in Lightbox öffnen.

Legenda da maletgs: In model da la nova basa «Camera Obscura» che vegn realisada sin il Pass dal Bernina. MAD

Las renfatschas vegnian adina puspè or dal medem ravugl, manegia Alessandro Della Vedova ed ellas hajan plitost da far cun gieus da pussanza politics che cun la chaussa sezza. La reproscha ch’il chantun sguazzia raps cun l’investiziun da bun 10 milliuns francs per in nov edifizi per l’Uffizi da construcziun bassa sin il Pass dal Bernina, na saja betg giustifitgada, ha declerà il cusseglier guvernativ Mario Cavigelli.

«  Il Chantun na sa lascha betg metter sut squitsch da privats. »

Mario Cavigelli
Cusseglier guvernativ

Ch’ins n’haja betg decis da realisar la nova basa al lieu existent da la veglia ch'è en possess d’ina interpresa privata, haja gì da far cun il pretsch che l'impressari haja vulì per il terren, collià cun ulteriurs pajaments durant onns. Quai na vegnia betg en dumonda, uschia Cavigelli. Perquai hajan ins decis da realisar la nova basa per l’Uffizi da construcziun bassa in pau pli bass sin la via dal Bernina sin terren communal da Poschiavo.

Betg morder en il maun ch’ins pavla

Er tar la vendita dal terren da var 6000 meters quadrat al chantun Grischun, haja la vischnanca fatg in pretsch memia bass, quai in’ulteriura reproscha a l’adressa da la vischnanca da Poschiavo, oravant tut al president communal, Alessandro Della Vedova. El sa dosta e relativescha ch’il pretsch na saja mai stà uschè bass sco quai ch’i vegnia quintà en ustaria. Ultra da quai è il deputà en il Cussegl grond Della Vedova cuntent e grat per il sustegn da Cuira. Il chantun haja investì ils ultims 10 onns passa 30 milliuns francs en la regiun dal Puschlav. Quai saja in cler segn, ch’ins n’haja betg emblidà la val taliana.

RR actualitad 17:00