Siglir tar il cuntegn
Inhalt

Valladas talianas Alessandro Della Vedova - victima da hackers

Il deputà e president communal da Poschiavo ha stuì far ina nauscha experientscha. Mardi en damaun ha el sentì che ses account da mails è vegnì hackà. Ils nunenconuschents han tramess a tut ses contacts in mail ch'el saja en vacanzas, haja pers tut e ch'el dovria 1'000 euros per pudair turnar.

Alessandro Della Vedova
Legenda: Alessandro Della Vedova mad

Alessandro Della Vedova ha pensà che quai saja in mal stinchel, cura ch'el ha avert in mail ch'el ha survegnì da si'atgna adressa. En quel stevi ch'el saja en vacanzas a Cipra ed haja pers tut ses daners e documents. Ch'el dovria 1'000 euros per pudair turnar.

Pers tut ils contacts d'e-mails existents

I dettia chaussas pli malas en la vita, ma i saja ina chaussa fitg stentusa, uschia Della Vedova. I saja gartegià da salvar mo paucs mails e contacts e tut la chaussa haja custà ina massa temp. El haja dentant emprais da sa segirar meglier e spetga ussa sin resultats da las retschertgas da la polizia.