Siglir tar il cuntegn

Header

cuntegn

Anna Giacometti Cumissaria da la regenza per Roveredo

Anna Giacometti duai gidar la vischnanca da Roveredo da dumagnar sia crisa instituziunala. La regenza ha nominà la cussegliera naziunala e presidenta communala da Bregaglia sco cumissaria per Roveredo.

Giacometti duai cussegliar ed accumpagnar la vischnanca. Vinavant duai ella analisar ils process en l'administraziun e schliar ils conflicts interns. Dapi las elecziuns per la perioda 2019 fin 2022 è l'elecziun d'in 5avel commember da suprastanza stada dispitaivla. Quai ha tranter auter er occupà duas giadas il Tribunal federal.

Il mandat è terminà fin la fin da settember 2020. Lura sto ella dar giu in rapport a la Regenza. Quella decida lura davart eventualas ulteriuras mesiras.

Profil ideal

Tenor il manader da l'Uffizi chantunal da vischnancas, Thomas Kollegger, accumplescha la cussegliera naziunala tut las pretensiuns per quella lavur: ella discurra taglian, haja gronda experientscha en l'executiva, enconuscha ils process en ina vischnanca ed ella saja neutrala. Ina gronda selecziun tranter persunas cun quel profil na dettia tenor il manader da l'uffizi betg.

Indemnisaziun per ina cumissaria u in cumissari

Avrir la box Serrar la box

Ils custs per la lavur d'ina cumissaria u d'in cumissari da la regenza sto surprender la vischnanca. Uschia il manader da l'Uffizi chantunal da vischnancas Thomas Kollegger. Ina cumissaria survegnia ina paja per ura. Vitiers vegnia pajà l'albiert e la dunsena. La paja maximala per in di saja, tenor Thomas Kollegger, tar 1'200 francs. Quant auta che l'indemnisaziun per ina cumissaria u in cumissari è a la fin, dependa er quant engaschi ch'è necessari.

Dumandà il chantun d'intervegnir

Per differents motivs han dus commembers da la suprastanza sco er la cumissiun communala da gestiun dumandà il chantun d'intervegnir. La suprastanza entira n'ha betg pudì prender formalmain posiziun davart las dumondas d'intervenziun, perquai ch'ella n'era betg abla da decider a chaschun da la sesida dals 8 da zercladur 2020.

audio
Per tadlar – las novitads da las 12:00
ord Actualitad dals 18.06.2020.
laschar ir. Durada: 6 minutas 22 Secundas.

RTR novitads 11:00

Artitgels legids il pli savens