Siglir tar il cuntegn

Header

Navigaziun

cuntegn

Valladas talianas Bondo è preparà cun sistem da segirtad encunter bovas

Suenter pliras grondas bovas en la Val Bondasca en Bregaglia ils ultims onns, han ins realisà entaifer 3 onns trais installaziuns cun in alarm da segirtad.

Il Piz Cengalo en Bregaglia è activ. Adina puspè datti bovas sin quella muntogna en la Val Bondasca. Quella dals 27 da december 2011 è stada in’enorm gronda. 1,5 fin 2 milliuns meters cubics material eran sa distatgads. Otg mais pli tard ha in grond urizi procurà ch’ina part da quest material è vegnì schlavà or per la val fin a Bondo. La devastaziun ed il schoc è stà grond.

Evitar ina repetiziun da la catastrofa

L’eveniment dal 2011 è stà motiv da construir ils sistems da segirtad e d’alarm. Durant trais stads han ins observà cun installaziuns da radar il grip dal Cengalo. Il resultat da quellas observaziuns è, ch’il grip è magari en moviment. Uschia ch’in eveniment sumegliant pudess sa repeter.

Mesiraziun cun staziun da radar

In’ulteriura installaziun da segirtad è la staziun da radar a l’entrada da la Val Bondasca. Quest sistem d’alarm procura, ch’ils responsabels vegnan alarmads apaina che l’aua crescha. Las vias a ed enturn Bondo pon vegnir serradas immediatamain suenter l’alarm.

Batschigl a Bondo

Sco ultima mesira da segirtad han ins construì in batschigl a Bondo cunter aua gronda. Quel riva da tschiffar bun 60’000 meters cubics material. Entaifer be 11 mais han ins realisà il batschigl che ha custà radund 5,5 milliuns francs. Finanzià il project dal batschigl han la Confederaziun, il chantun Grischun e la vischnanca da Bregaglia.

Cun quellas trais mesiras da segirtad dessan ils abitants da Bondo e conturns puspè pudair durmir pli quiet.