Bun Festival da Chastognas malgrà pli paucs visitaders

Pervia da las bovas da Bondo è pli pauca glieud vegnida al Festival da Chastognas en Bregaglia. Tuttina è l'organisaziun da turissem cuntenta. Ch'il festival haja insumma gì lieu saja il pli grond success.

Trais chastognas brinas anc en lur paletscha cun spinas melnas. Bild in Lightbox öffnen.

Legenda da maletgs: Per la 13avla giada ha il Festival da Chastognas gì lieu en Bregaglia. Keystone

Tenor Michael Kirchner, il directur da Bregaglia Turissem, han bunamain 900 persunas visità il Festival da Chastognas en Bregaglia durant las ultimas trais emnas. Quai saja in zic pli pauc che durant ils ultims onns, cura che passa 1000 persunas hajan mintgamai visità quel.

Suenter las bovas da Bondo na saja dentant insumma betg stà cler, sch'il festival duai avair lieu, perquai sajan els fitg cuntents cun las cifras. La Bregaglia haja pudì mussar cun il festival, ch'ella saja dapli che mo ina regiun da bovas. Quest signal saja stà il pli impurtant, betg sulet per l'organisaziun da turissem, mabain era per ils indigens, uschia Kirchner.

Il Festival da Chastognas ha cumenzà l'emprim d'october ed ha tematisà cun numerusas occurrenzas tut las fassettas da la chastogna.

RR novitads 17:00