Sin l'A13 sper Mesocco hai dà ina collisiun frontala tranter dus autos. Quatter persunas èn grevamain blessadas. Curt avant l'access nord da Mesocco sajan dus autos collidads frontalmain suenter che l'auto che charrava a val è vegnì sin il vial oppost scriva la polizia chantunala.
Ina persuna è vegnida serrada en ed ha stuì vegnir deliberda dal salvament da via San Bernardino. Duas da las persunas grev blessadas èn vegnidas transportadas cun dus helicopters en ils ospitals a Lugano ed a Cuira. Ambulanzas han transportà las duas ulteriuras persunas grev blessadas en ils ospitals a Lugano e Bellinzona.
L'autostrada è stada serrada durant 3 uras en omaduas direcziuns tranter Mesocco nord e Pian San Giacomo. Il traffic d'autos è vegnì svià sur la via chantunala.