La situaziun actuala na cuntentia betg. Quai la quintessenza da l’ultima sesida dal parlament da Poschiavo. La preschientscha da la Polizia chantunala en vischnanca na saja betg gronda avunda cun 25 uras al mais.
Pliras opziuns
La vischnanca da Poschiavo ha perquai schlià il contract cun la Polizia chantunala anticipadamain, in onn pli baud che previs. Quai per evaluar las opziuns. Dad ina vart fiss ina collavuraziun cun autras vischnancas ina pussaivladad, da l’autra er ina polizia regiunala.
Nagin basegn
Sco quai ch’il president communal da la segunda vischnanca en la Valposchiavo, Arturo Plozza, ha ditg a RSI, na saja l’interess d’in mandat cuminaivel dentant betg avant maun per il mument. A Brusio saja en funcziun l'uschenumnà «fant», in policist communal che accumpleschia ils basegns da la vischnanca.
1 onn temp
Fin ch’il mandat cun la Polizia chantunala scada, duai vegnir elavurada en in proxim pass ina glista cun tut ils basegns, urdens e duairs ch’ina vischnanca sco Poschiavo spetga d’in servetsch da polizia. Quai per preparar in nov mandat da prestaziun. Bain pussibel che quel resta er vinavant cun il medem partenari. Tut tenor vegniss en dumonda perfin ina collavuraziun cun la polizia communala da San Murezzan.