Il cunfin a Castasegna en la Val Bregaglia è in dals cunfins preferids per ils Engiadinais. Numnadamain han blers Engiadinais ina chasa u ina rulotta da vacanzas al lai da Como. Dapi l’avertura dal cunfin talian ils 3 da zercladur èsi però stà quiet al dazi a Castasegna. Tenor Malvin Hort, il schef da team dal dazi a Castasegna haja quai d’ina vart da far cun la malsegirezza causa il coronavirus, da l’autra vart saja però er l’aura in factur decisiv.
Scumandà da cumprar en
Vegnir sur cunfin vegn actualmain be tgi che ha in motiv plausibel sco per exempel ir a visitar parents ubain ir en la chasa da vacanzas. Excursiuns be per ir a cumprar en sur cunfin èn anc scumandadas. Vi da quel scumond sa tegnan tenor Malvin Hort ils blers. I dettia però Talians che vulan ir a tancar en Svizra, quai che n’è er betg lubì. Quels automobilists han da sa volver directamain al dazi a Castasegna.
Dentant, la situaziun dad oz ch’è in zic cumplitgada mida bainbaud. Ils 15 da zercladur avra numnadamain er la Svizra puspè ils cunfins cun l’Italia.