Ils da Roveredo han l'october 2018 gì d'eleger ils tschintg commembers da la suprastanza communala. Tenor il resultat da las elecziuns aveva la glista PLD-Roré etica survegnì trais sezs. Ils ulteriurs dus sezs eran ids a la glista Roré viva. La differenza da vuschs tranter las duas glistas aveva però be muntà a trais vuschs. Da dumbrar anc ina giada las vuschs aveva la vischnanca però refusà.
Segunda dumbraziun
In suprastant betg reelegì da Roré aveva perquai sa drizzà a la Dretgira administrativa dal Grischun cun in recurs per cuntanscher ina nova dumbraziun da las vuschs. Er la segunda dumbraziun aveva confermà il resultat.
Suenter questa decisiun è il recurrent, ensemen cun auters exponents, anc ina giada sa drizzà a la Dretgira administrativa. Els han fatg valair ch'i sajan vegnids resguardads er cedels d'elecziun da valaivladad dubiusa tar la segunda dumbraziun.
Midada da las forzas politicas
In'ulteriura analisa da las vuschs, il fanadur dal 2019, ha lura mess sin chau il resultat oriund da las elecziuns. En consequenza ha la glista Roré viva survegnì trais sezs e la glista PLD-Roré etica be dus sezs enstagl da trais.
Sco proxim ha lura la secziun da la PLD fatg recurs tar il Tribunal federal ed ha uss survegnì parzialmain raschun. La decisiun precedenta è uschia vegnida annullada.
La chaussa va uss anc ina giada enavos tar la Dretgira administrativa dal Grischun. Quella sto anc ina giada evaluar la valaivladad da tscherts cedels d'elecziun per determinar las forzas en la suprastanza da Roveredo.
RR novitads 08:00
