Fieu en Val Mesauc brischa vinavant – A13 puspè averta

Dapi il mardi saira brischa in grond fieu da guaud en la Val Mesauc tranter Soazza e Mesocco. Tenor William Kloter da la Polizia chantunala n’è il fieu anc betg sut controlla. Helicopters emprovan da stizzar l’incendi. L'autostrada e la via chantunala èn puspè avertas.

Laschar ir video «Grond incendi en Val Mesauc»

Grond incendi en Val Mesauc

4:02 min, Telesguard dals 28.12.2016

L'impurtant en furma concisa

  • Da preschent brischa ina surfatscha da 1’200 meters ladezza sin 600 meters da la costa si.
  • La distanza dals fieus ed ils vitgs da Mesocco e Soazza munta mintgamai a radund 500 meters.
  • Infurmaziuns davart blessads na datti naginas.
  • La via chantunala sco er l'autostrada tranter Mesocco e Soazza èn puspè avertas per tut il traffic.
  • Dapi mesemna a las 08:00 vala in scumond absolut da far fieu en tut las valladas dal sid dal Grischun.
  • Curt avant las 18:00 dals 27-12-2016 ha la Polizia chantunala survegnì in'annunzia ch'il guaud tranter Mesocco e Soazza brischia.

Situaziun dependa dal vent

La situaziun en il territori dal fieu da guaud en la Val Mesauc resta tendida. Il fieu na saja anc betg sut controlla, ha ditg William Kloter da la Polizia chantunala avant curt.

Bain cumbattian sis helicopters – trais Super Pumas da l'armada e trais helicopters civils – il fieu ord l'aria e vegnian da limitar il fieu en il nord ed en il sid. Dentant cun far stgir na saja betg pli pussaivel da sgular.

Ils pumpiers restan en posiziun per proteger ils vitgs vischins al fieu, Mesocco e Soazza.

Incendi en la Leventina sut controlla

L’incendi en la Leventina è entant sut controlla. Durant la notg vegn il lieu dal brischament surveglià da radund in tozzel pumpiers. Las lavurs da stizzar il fieu duain cuntinuar la gievgia a bun’ura. Radund 40 forzas d’agid e quatter helicopters vegnan ad esser en acziun, communitgescha la Polizia chantunala dal Tessin. L’incendi era vegnì chaschunà da quatter giuvenils ch’avevan fatg in fieu sut tschiel avert.

RR novitads 16:00++