Siglir tar il cuntegn

Header

cuntegn

Valladas talianas Il project «Bernina Fly» vegn mess sin glatsch

Enfin che la planisaziun locala na saja betg revedida na possian ins era betg cuntinuar cun la planisaziun. Quai di l'inizianta dal project Fabiola Monigatti envers RTR.

Realisar il «Bernina Fly» pon ins be, sche la nova planisaziun locala da Poschiavo permetta da realisar a Cavaglia attracziuns turisticas. Enfin che quai n'è betg il cas, hajan els decis da metter sin glatsch il project, uschè Fabiola Monigatti.

La vischnanca da Poschiavo è actualmain vi da la revisiun da la planisaziun locala, tenor la lescha chantunala per la planisaziun dal territori. Cura che questa vegn ad ir en vigur è anc avert.

Dar si na vegn betg en dumonda

Encunter il project hai gia dà opposiziun da diversas varts. La fundaziun per la protecziun da la natira, Mountain Wilderness Svizra e la Pro Natura han sa dostads encunter il project ed era da possessurs da terrain hai dà opposiziun. Tuttina na vulan ils inizants anc betg dar si lur idea. Fabiola Monigatti e Gian Paolo Lardi crajan vinavant londervi da pudair realisar in di il «Bernina Fly».

Cun 90 km/h giu da la val

Il «Bernina Fly» è ina tirolienne da radund 2 kilometers lunghezza, nua che giasts pon sgular da la val engiu cun enfin 90 km/h.

audio
Per tadlar curt e cumpact
ord Novitads dals 18.10.2019. Maletg: RTR
laschar ir. Durada: 49 Secundas.

RR novitads 06:00

Artitgels legids il pli savens