Valladas talianas - Ils incendis èn sut controlla, però betg anc stizzads - Novitads

Valladas talianas Ils incendis èn sut controlla, però betg anc stizzads

En la Val Calanca e la Val Mesauc èn ils incendis bunamain stizzads – en mintga cas sut controlla. Co vesi ora ussa, e tge capita sco proxim?

Autur: Lea Livers / Carlo Albin

audio

Mezdi: Incendi a Mesauc – Kloter e cuntent co tut haja funcziunà

ord Actualitad dals 29.12.2016.

laschar ir. Durada: 7 minutas 6 Secundas.

En la Val Calanca ed en la Val Mesauc è il mument tut sut controlla. Ord motivs da segirezza ha la via principala puspè stuì vegnir serrada. I guardia dentant ora bain, di il William Kloter da la Polizia chantunala ad RTR. Anc èn ils helicopters en funcziun, dentant spera Kloter ch'els na sajan betg pli necessaris damaun.

Il Cusseglier federal Guy Parmelin ha visità las forzas da protecziun sin il plaz en la Val Mesauc. El è il minister dal departement da defensiun e protecziun civila.

Fieus sut controlla – Optimissem da stizzar anc oz

Il mardi aveva cumenzà a brischar il guaud en la Val Mesauc. 1'200 meters sin 600 meters gronda è stada la surfatscha ch'ha brischà. Sur notg è lura sa quietà il vent, uschia ch'ils pumpiers han pudì controllar il fieu. Er en la Val Calanca ava quai cumenzà a brischar. Entant è era quest fieu sut controlla, ha ditg la polizia chantunala grischuna.