Siglir tar il cuntegn

Header

Navigaziun

chesa
Legenda: Il lieu da scolaziun dal nov Centro Tecnologico del Legno a Poschiavo A. Caprez
cuntegn

Valladas talianas Inauguraziun dal Centro Tecnologico del Legno

Quai ch'aveva cumenzà avant 6 onns sco idea, è daventà realitad. En las miraglias dad in’anteriura interpresa ch'elavurava crappa, han ins realisà entaifer in onn il nov center da cumpetenza Centro Tecnologico del Legno cun in’investiziun dad 1,2 milliuns francs.

La finamira è da scolar surtut falegnams e persunas che han da far cun l’elavuraziun da lain. Sco che Karl Heiz, il president dal cussegl administrativ dal CTL ha ditg a l’avertura, fetschian ins quint cun fin 90 % scolars che derivan da la Lumbardia.

Legenda: Guardar il video Inauguraziun dal Centro Teconologico del Legno. Durada 01:01 minutas.
Or da RTR dals 02.10.2015.

L'acziunari principal dal center da cumpetenza è cun 49 % l’institut per perfecziunament professiunal (iBW) a Cuira. Plinavant è participada, sper la confederaziun ed il chantun, er la vischnanca da Poschiavo.

Gronda lavur cumenza pir ussa

Ils emprims curs han gia gì lieu, la purschida da differentas scolaziuns duai vegnir schlargiada cuntinuadamain. La pli gronda sfida cumenza tenor Heiz dentant pir cun la recrutaziun da students. Quai surtut uss cun il ferm franc svizzer che chaschunia ina situaziun pli difficila ch'anc avant in pèr onns.

Tut ils responsabels èn da buna speranza ch’il nov center possia esser ina schanza per la Val Poschiavo e stgaffir novas plazzas da lavur, surtut en in temp difficil per il turissem e per l’economia d’energia. Il CTL è renconuschì tar ils vischins talians sco scola e vegn perquai era tractà medem sco las autras scolas en Italia.